Home » Gedichter

kiekoet  *      

 

rechs louge de teikensjpulle

góm, pensele hel en zach

sjere, beusjtel en óntvètter,

sjtreepbehang en terpetien

kwaste, vètkriet en ouch plekbandj

verf en ink en sjetspepier

lènks de sjlók, de wienbel, rood

salmiak en zjwart-op-wit

belga kawgóm,  oukouksjtaefke

nogablökskes en zuithout

ouch de flesje vól mit zoerböl

zeen gans dóf, vergaete, laeg

achter glaas gebleikde fotoos,

mee es ’n herinnering.

 

2019©johnhertogh - zwentibolddichter

 

(*kiekoet=etalaasj)

=======================

 

VASTELAOVEND   (’n acrostichon)

Veer zóchte nao kojbojs en waore zelf indiane

Allemaol op jach wie de richtige Mohikane

Sjeite en sjloepe door sjtraot, gats en paad

Taenge de doosj 'n flesj priklimmenaad.

Ein pekske dat maakde de mam flot van zek

Langs bókspiepe woorte get fraanjele geplek.

Allenej haw’ veer metser, bäög en biele

Ouch sjneje veer zelf oet witse de piele.

Vastelaovend oet mien jeug, da’s zo lang gelee.

En zoget vergits te van ze laeve noots mee.

Nemes, nae nemes nump dat van mich aaf

Daoróm roup ich drie maol  hel: “ALAAF!”!

Kolleberg

 

 

de kruutswaeg                                  langs de zeve voutvel                       löp nao baove                                  pès aan de kapel 

de duuster gats geit lènks               de holle waeg ómhoog                    ’t gevreur zit allein nog in de lóch  kleur op de bakke                           pratsj aan de vuit

de eenzame wanjelaer

zunk Jochems leidjes

van zefke meols pès 't krutske,

van zjwerbelke pès treeske

aaf en toe wurt hae óngerbraoke

door ein vluch verrasjde veugel

opgejaag door 'ne sjpeurende foks

langzaam wurt 't sjtil 

 

dec 2018(c) john

====================

Naojaorsbeelde

 

ich zeen en ruuk

en vuil de herfs

heur fluust’rende wèndj

tel krakende tek


blaedjes dwarrele

en sjarrele tösje
gerooide maïs in de

pratsj van de baek

 

griesgraw gawze

vleige nao ’t zuje

nao dae platte sjtraep

van wiedeweg

 

‘n dunne dèkke
van dampige lóch

sjtieg lankzaam op en

vlug traog de veugel nao

 

de doje maelder hink vas

inne geknakde kale sjtroek

op ‘ne sjmale einzame paol
lek de ruiver al zien luppe…

======================

ummer mee

gans lang gelee

doe loug de bieb

die van mien jeug

in ’t patronaat

 

‘t eesjte bouk

dat ich dao lous

waar van Dik Trom

mer ich wól mee

 

van Arendsoog

pès Pim Pandoer

van Biggles en

Kameleon

 

de rieje dao

mit kènjerbuik

die woorte sjmaal

ich lous gans sjnel

 

ze kènde mich

dao in die bieb

en hólje dèks

al buiker vas

 

mien patronaat

waar flot te klein

‘ch góng mit de fits

de sjtad doe in

 

de buik die ich

van dao mitbrach

beveile mich

waek in waek oet

 

en saer daen tied

zeen buik mich leif

’t sjmaak nao mee

jao ummer mee

 

 

© johnhertogh - zitterd

+++++++++++++++++++++++

weka voetbal

 

gein hends

zaet de

video sjeids

 

wienee  kriege

veer zo emes

 

veur vraem besjlssinge

veur vraem oetsjpräök

veur al dat ónrech

 

erm vmbo leerlinge

erm voetballesj

 

29-06-18 © johnhertogh

 

=====================

Tour de France

 

 

sjone sjnelle sjport

 

roukende reklamewages

mit hónderde petjes

en plestik prölle

 

weggesjmete drènkflesje

laeg drinkgelletjes

vervoeling euveral

 

rónkende  wages

sjtinkende  moters

kwalmende helikopters

 

gelökkig geef ‘t nog

geine geurtelevisie

 

nao veure Dylan

nao veure Tom

 

sjone sjnelle sjport

 

 

2018©johnhertogh

 

===================

versjtaot uch

 

wie water en vuur

wie chóklaad, mèlk en puur

wie nao veure Fortuna

en los joa van kloeb Roda

 

wie water en vuur

wie Kolleberg en Côte d'Azur

wie babbelaere, zuit en zoer

klein aerpel en kóntente boer

 

wie water en vuur

wie gans billig en paeperduur

wie werm beier en kawwe wien

wie zeker en nog neit mesjien

 

 

wie water en vuur

wie drank en óntwènningskuur

wie dominee en meneer pesjtoor

wie hardrock en gemenk koor

 

wie water en vuur

wie de trainer en besjtuur

wie Trump en dae Poetin

wae geluif dao nog in?

 

versjtaot uch.

 

 

vuil ‘t vruigjaor                      

 

ich zeen

de eesjte krokusse

gael  en blaw

tösje de lètste sjnei

ich ruuk

ein zachte sjoel raege

die de aerd plaog

gans aeve mer

ich heur

wie de veugelkes

zèngentaere sjnäöre

van sjtroek pès boum

ich pruif

wie de vreche eikhoorn

zich tegoud deit

aan de toevallig trökgevónje neut

ich zeen

wie de eesjte kroenekrane

mit kreftige sjlaeg

hoog euvervleige

ich vuil 't vruigjaor                            

 

 

meert2018©john

===================

gedanke in de Patesjkirk

 

Lang geleje zóng ich hie in ’t mannekoor

Wae waar doe ouch weier meneer pesjtoor?

 

‘t Gregoriaans waar mich neit ónbekènd

in Albaers kleske woort’ veer daomit verwènd

 

Rippeteiere deige veer baove, in dae zaal

en zènge, bie d’n órgel, op ’t oksaal

 

Ich weit dat de note op veier lienkes sjtónge

en ouch dat veer jaorliks op koorreis gónge

 

Ein sjoon kestuum woort mich aangemaete

en dan op reis: sjpas, beier en goud aete

 

’t Nondedjuke bleef nooits rechóp sjtaon,

waafer muite ich daoveur ouch höb gedaon

 

Veurdat ein mès goud en waal waar begónne

hawwe veer al väöl sjoon sjtökker gezónge

 

Ich fantaseierde dat ich zóng en sjpeelde

mit die grote, zo vertroewde heiligebeelde

 

Mit de Heilige Rosa en mit Sint Katriena

die koum, lous ich later, wied weg oet Siena

 

Toch mót ich mich ei bietsjke sjame:

höb niks gesjreve euver glaas in lood rame

 

Want taengeneuver ’t beeld van Heilige Blasius

vèndj geer ein sjoon raam van Sint Ignatius

 

Veural es dao ‘sjmiddigs de zón vol op sjeen

gouf en geef ’t  dao väöl sjoons te zeen

 

Wiejer bèn ich väöl vergaete of gans kwiet

trök nao de Patesjkirk ? ich gluif ’t wurt tied

 

jan2018© johnhertogh

 

=====================

zjwieg

 

de waeg

waar nog naat

mer de zón

sjpouwde zich

om ‘m te dreuge

de percessie

begoosj te trèkke

meneer pesjtoor

leip gans veuraan

d’n daeke góng neit mit

sjtóng waal

mit de maad

in vol ornaat

ónger de paort

drie kènjer

hónge aan de rok

van häöm

neit van häör

ei beeld

dat me

noots vergit

 

ziene pap haet ‘r

noots gekènd

zaet ‘r

d’n daeke

des te baeter

 

zjwieg noe mer

 

meert2017©john

=========================

 

 

 

 

 

vrei - vrieheid

 

laot  de kènjer in vrei

laot de luuj in vrei

 

vrei in dörp en sjtad

vrei in ’t ganse landj

oppe ganse welt

 

laot de kènjer in vrieheid sjpele

laot de luuj in vrieheid laeve

laot jederein mit rös

 

ich wil rös in miene kop

en vrieheid in miene kop

mer ouch vrei in miene kop

 

 

april18©johnhertogh

 

====================

tweesjtried /dilemma

 

’t maak  zich toch óm zoväöl drök

doe bès toch waal op tied trök

vèndj hae mich wurkelik zo leif

woróm sjrif hae dan z’ónne breif

zal ich opsjtaon, wiejer sjlaope

mit vinster toe of vinster aope

miene rómmel op gaon rume

mit taengezin en gans väöl kume

altied weier dat gemekker

wo is d’ oplajer, wo de sjtekker

zèk, mit dae sjlumme telefoon

kèn ich dao niks sjtóms mit doon

nao de Etos of de Hema

’t blif jao ummer ein dilemma…

 

meert2018©john

========================

 

koraal,

oftewaal ’t leid van ein zate vleig

 

‘t is mich toch zó sjiet-egaal

zóng de zate nachtegaal

zie maakde daobie z’ón kabaal

me vónj dat ech neit mee normaal

 

häöre zank ónmuzikaal

en ‘t waar ein groot sjandaal

dat zie jederein verbaal

oet bleef sjèjje, gans banaal

 

trap ’s op dae rempedaal

en doog ’s neit zo asociaal

woort geroupe oet de zaal

mer zie negeierde dat signaal

 

toch verloor ze häör’ moraal

sjnapde zich ein vaere sjaal

voul bekans nog in ’t portaal

en zjwèjde daobie amicaal

 

saoves zoug me in ’t journaal

‘ne rare vogel blóndj en sjmaal

gevónje in ein dreug kanaal

zèngentaere: sjiet-egaal…

 

 

meert2018©john

 

=====================

 

sjmerig sjpaor

 

jóng berkebuimkes

op de plei

geknak wie zjwaegele

achtergelaote mikado

door volwasse kènjer

beierblikskes

oetgekots

naeve en euver

’n gesjtrikde clubsjaal,

’n gesjeurde vaan

gesjplete gedanke

barsjte in de kop

neit allein in Rome

wae haet noe verlaore?

 

oet de bundel "Sjmerig sjpaor en anger werk" 2015©john

 

===========================

 

terrastoeriste

 

ich zout lès op ein sjoon terras

haw dao allein van wèspe las

en de toeriste naeve mich

die krege doosj, genaw wie ich

 

ze hawwen ’t beheurlik werm

mit zjweit op blote bein en erm

mer wie d’n ober entlik koum

doe vroug me lachend kouk mit roum

 

gevat antjwoordde de jónge sjnaak:

vandaag wurt dat neit mee gemaak

wilt geer neit leiver ’n glaas wien

of limburgs beier, sjmaak ouch fien

 

dat höbbe ze dan mer gedaon

en wie ze heivesj wólle gaon

hoort me nog lang hun hel gezang:

‘veur wèspe zeen v’r gaar neit bang’

 

wie ich ze ’sjmörges weier zoug

hawwe d’r twee ein gans dik oug

de res zout sjtilkes op ‘n bank

koum dat door wèspe of door drank?

 

aug2016©johnhertogh

 

=========================

veurbie?

 

wie veer in 1944 woorte bevried

waar ich nog neit gebaore…

 

vief jaor later koum ich pas oppe welt

en kèn de verhaole allein van heure zègke…

 

van wie de pap zich in de koel mous versjtaeke

ómdat hae nao ‘ne pruus haw gesjpied…

 

van de femiejes Horn, Sassen en Wolff

die nooits mee zeen trökgekómme…

 

van wie opa bekans woort opgepak

ómdat hae de radio oet zien henj leit valle…

 

van wie nónk Pierre granate góng oprume

tant Lies bleef achter mit veier klein kènjer…

 

die verhaole kómme ummer trök

ouch nao zoväöl jaor

 

veurbie, mer neit vergaete

 

zitterd © johnhertogh

 

=========================

och wie sjoon

 

och wie sjoon is dezen aovend

jederein zit in zien häöfke

klasjeneiert fluusterentaere

mit plat water, wien of pils

 

gans d’n daag wurt naogeloupe

väöl sjlech nuuts dat gouf ’t neit

lansem wurt ’t leich get minder

zachte wèndj peunt ós gezich

 

pès de naober zich bedach haet

dat ‘r barbecue-e geit

blawwe rouk deit sjtuil versjuve

en hae vlouk: ‘t vleisj verbrent

 

aan de anger ziej ein vuurkörf

gans gevöld mit vóchtig hout

dampe vónke hoog de lóch in

flot gaon alle vinster toe

och wie sjoon waar dezen aovend

 

aug2015©john

 

=====================

x-gedich

 

gedich of ei verhaol

sjrief doe mer get gesjix

 

de blaore op mien zeel

die koume neit van nix

 

applaus van volle zaal

sjus wie-s te ’t bekix

 

’t deit dich neit mee väöl

es doe dao ónger lix

 

dan is dat sjiet egaal

‘ch höb dit waal gefix !

 

====================

 

sjtarre

 

awee, ein sjtar is kwiet

sjtarre sjtaon veur leich

sjtarre in de lóch

gebakke lóch

bakke, kaoke, braoje

wenig oppe tejjer

väöl oet de beusj

nog ummer hónger

drie wieze vónje ein sjtar

brachte ze nao de

voedselbank

sjtaon v’r noe quitte

 

dec2017©john

 

========================

ónger de linjeboum (Ligne)

 

doe höbs mich verrasj

ich waar verpópzak

wie ich dich zoug ligke

oppe teikentaofel

 

wie-s se langs koums

oppe blinkende sjirme

van de óntwerpesj en

in de glanzende foldesj

 

ze mochte dich eesj neit

doe zouws te groot zeen

te duur zeen en neit

bie Zitterd heure

 

ze lachde dich oet

ze brouke dich aaf

’t doerde lang veurdat

de mei op ’t daak sjtóng

 

en dat onneuzel gevreigel

euver de passende naam

’t woort Linge gelökkig, gein

S/phere, Atmo of Signa.

 

ich zoug dich gruie

vanoet die hoog lif

bie de “aope daag”

genaot ich van de boew

 

ich bleef dich volge

waar sjtikkem sjeloes

höb ei momènt gedach

óm hie te kómme wone…

 

noe laes en sjrief ich

op nujerwètse sjtuil

mit ’t sjoonste oetzich

euver ós fejn sjtedje

 

hie höb ich ‘t gevónje

zeen jónk en awd sjtudeiere

aete, sjanse en flaneiere

tösje sjtein, betóng en glaas

 

ich sjnoef de fiene geur

van heite, sjtrange kaffe

en sjpich mich op ein

breudje werm vleisj mit saus

 

hie belaef ich de welt

ónger deze linjeboum.

doe höbs mich verrasj

jao, ich bèn verpópzak.

 

april2017©john

============================