vergaete?

hie lik ich dan, zo gans allein             

de res sjteit sjtevig in de gróndj

zeen ze mich vergaete soms

veer heure toch biejein

 

ein gaat te wenig, dat is klaor           

en nurges veur mich plek

ich zou zo gaer, jus wie de res

rechop sjtaon, eerlik waor

 

mien wortels zitte in ‘n net

wie haore in ein knot

dao ónger waer ich die waal kwiet

ze zeen dan gans verrot

 

es sjnei vilt op mien sjèl en tek

gevreur aan wortels vrit

dan waar mien laeve toch te kort

en dit ein laege plek

 

wae greef mich toch dat rónje gaat

wie veur die anger buim

wae redt mich oet d’n haard of körf

’t is nog neit te laat.

 

081222©johnhertogh   foto:  tösje meule- en middewaeg.                           

 

 

=====================

 

sjrieve euver  

ich höb mich gans hel veurgenómme

neit mee zoväöl euver luuj te sjrieve,

want aeve dèks krigs te sjtank veur dank

daoróm sjei ich dao veurluipig mit oet!

 

ich sjrief lever euver ós sjoon modesjtaal

mit die fejn weurd en oetdrökkinge

 

euver tradities en feeste, aete en drènke

van ein tuut beier of ein glaeske sjnaps

 

euver fiene peuzel en zjwaor taofele

van huidvleisj, sjènkesjpek of kappesmous

 

nog lever sjrief ich euver natoer en beeste

euver koelköp, kraoje, hounder of hane

 

van moutrop*, maelder, sjpènne en sjäöp

of kawver en knien, sjlekke en sjtier

 

van veugel en vösje, mögke en muus

euver sjtreu en sjtruuk of buim en bósj

 

van kaaf en kaore en gaffel en gaesj**

euver sjpelt en sjtóppel, tódder en terf

 

en es ich daomit vaerdig bèn

sjrief ich mesjiens weier euver luuj!

mei22©john

*mol

** gerst

=====================

taengewèndj

hae haw mich neit

gewaarsjuuwd

de sjoeleradar

daoróm waar ich

get in de war

wie ich häöm voolt

de taengewèndj

ich waar zo döl

wie ein heksekèndj

eesj voolt ’t nog

gans  óngewènd

ein bietjske ónbekènd

verangering van vorm

woort sjus

nog geine sjtórm

sjpróng in ein

deipe koel

bang veur ein

hómmelsjoel?

gelök of pech

de dónder bleef

nog oere weg.

 

2022(c) johnhertogh

=====================

aafsjeid van 2021

me zaet ‘t toch zo dèks:             

dit jaor is ómgevlaoge                            

veur d’eine waar ‘t sjtil en sjoon

veur d’angere gans bewaoge                           

 

dit jaor is jao get vraems gebeurd      

’t is eigelik óm te sjame:

van aovendklokke pès lockdown

wie kóm’ veer oots weier same?         

 

de polletik vandaag d’n daag

bekènt ouch noots ’n richtige kleur

ich gaef hun deze gouwe raod:

kaer eesj ‘ns veur eur eige deur

 

aetzake, kaffees en de res

die mouste weier sjtoppe

al die gesjefter zeen noe toe

en gaon zo nao de knoppe        

 

ouch same sjporte is veurbie

dat sjteit ouch allemaol sjtop

de jeug vervaelt zich gans terech

haolt zich van alles in de kop

 

‘t liek ’n gans groot drama

waat ich uch hiej vertèl

laot’ veer mer gans hel haope

dat dit verangert en gaer sjnel

 

dènk aan wie ’t vruiger waar

en vergaet besjmètte jaore

weg mit die elenj, weg mit dwang

veer höbbe al te väöl verlaore

 

ich höb mer eine wunsj veur uch

en dan is mien geriemsel klaor:

ich wunsj uch allenej väöl gelök

en gezóndjheid in ’t nuje jaor                              

dec2021©john

======================

oet leifde veur ’t zuje

 kómme en gaon

ze koume oet ’t zuje, van sjpanje en italië

mit ’n sjerp kontrak en gans väöl heimwee

‘t aete waar ónbekènd en sjmaakde ouch neit

baeter in ’t gezèllehoes... trök nao ’t zuje...

 

noe gaon véér mit ’t vleigtuug

nao dat zuje, nao dae sjone mediterranee

geneite van pasta en paella en

van de kleure en geure van ’t zuje...

 

toon oet zitterd vertrók oet ‘t  zuje,

jus wie chantal en huub, die twee oet tegele,

ze woorte bekènd in bènne- en boetelandj

mer koume trök, al waar ’t veur aeve,

vanwaege de leifde veur ’t zuje...

 

laot ós allenej blieve sjrieve euver ‘t zuje

in ós sjoon, zuvere modesjtaal

euver ós werm, poëtische provins,

oet leifde veur ’t zuje,

oet leifde veur ’t platbook...

 

       

juli 2021© John HertogH - Zitterd

 

====================

Kèns te dat?

 

Höbs te

dat ouch waal 's,

daste nao weurd mós zuike

en wits gaaroets neit mee wie 't geit,

dan begins te meistens gans hel te vlouke.

de weurd zeen opèns en euveral kwiet.

dat gevuil dat alle weurd opnuuts

gebaore mótte waere,

kèns te dat?

 

johnhertogh ©2013

=======================

 

 

 

 

 

tösje twee grenze,

ein jeugherinnering.

 

gebaore in de Sjpaorkollenie*

en groot gewasse bie de Hei**

boete sjpele waar doe gans geweun

sjtruine door de ruige Schwienswei***.

 

langs de wiejer, in bósj of veldj

ware veer ruiver, ridder of soldaot

veer sjpeelde pès d’n aovend voul

gónge dan braaf nao ós eige sjtraot.

 

wie veer doe get groter gruijde                        

• kaojónges woorte vlaegele -

gein muske belle of reipe sjlaon,

carbid en vunkele mit zjwaegele.

 

oppe fits gans nao Graasbrouk****

koelköpkes vösje in de baek

dèks kreeg veer pratsjnate vuit, of

mouste rènne veur gaffel, sjöp of raek.

 

’s zomesj trók’ veer nao de Maas

leipe sjtiekem nao de Belsje kantj,

-allein es ’t water gans leeg sjtóng -

of dreve in eine bènnebandj...

 

 

*wiek van Zitterd: Lömmericherveldj

**naobersjap in Euverhaove-Zitterd

***natuurgebied op grens Zitterd-Tüddern (D)

****kesjteel in Göttekaove/Bor

 

 

 

060821©John HertogH

===============

ónrös

 

richtig floep dae höb ich neit    

toch bèn ich dèks nog óngerös 

omdat ich vuil, in dezen tied,             

haet jederein zien eige sjtress. 

 

waal of gein blaw-witte maskes        

’t is vraoge nao bekènde waeg  

jedes maol weier nuje regels

en vrieheid is nog wied eweg.   

 

nondejuu, wo blif die sjpuit noe

‘t doert toch langer es gedach

gans väöl luuj mit zjwaore moud

ze höbbe al zo lang gewach.

 

op vakans mit bös of vleigtuug

gans wied weg nao zee en zón

mit de tent of mit de sjleiphut

wit geer nog wie dat doe góng?

 

dat dènke aan die vruiger tieje

geuf mich dèks ein goud gevuil

bèn dan weg van leid en elenj

dat wurt ouch mich waal ‘ns teväöl

 

laot veer haope dat al gans vlot

alles wurt wie veur twee jaor

dat veer helop zègke, sjreve:

v’r zeen mit dae corona klaor!

 

 

060821©John HertogH-=====================

paw of gaws?

 

ein gawzevaer

twee vingesj die

‘m sjtaats vashawte

 

ein seieraod van

zilver, robijn en goud

gein medaje mer ein sjpang

 

mien kleindochter

- opa is dat kuns ? - 

vintj ‘t mer eine pröl

 

daoróm geit ‘t deuske

mit zjwart floere kösse

veurluipig  weier toe

 

toch waal get greutsj

wie ‘ne pawhaan

pröl of prónk?

 

 

181220©JohnHertogH

 

NB John:

Dees sjpang höb ich gekrege wie ich uitgeroupe woort es Zwentibolddichter. 

======================

Beoordeiling gedich door Pronk!:

Sterkste / meest positieve aspect van de tekst:

 

Dit kleine gedicht is licht en luchtig, maar op een spontane manier ook strak gecomponeerd en muzikaal: het woord ‘sjpang’ breekt de regel en het eerste deel scherp af, de opmerking van de kleindochter staat op precies de juiste plaats tussen goed gekozen gedachtestreepjes, het tweede deel is een ontrafeling van het eerste en de laatste regel resoneert met de titel en bindt alles mooi samen...

Waaraan nog gewerkt kan worden:

Vormelijk klopt het gedicht , inhoudelijk is het zo licht dat het na afloop wat blijft zweven. Echt avontuurlijk is het niet, al maakt het lichte er net de charme van uit.

======================

klaor

 

richtig floep dae höb ich neit 

toch bèn ich waal óngerös      

weitend dat in dezen tied                    

jed’rein krig zien eige sjtress 

 

kiek mer nao die witte maskes         

vraoge nao bekènde waeg      

R. I. V.  M. en O.  M.  T.

ós vrieheid is zo wied eweg    

 

nondejuu wo blif die sjpuit noe

dat doert langer es gedach

jederein haet zjwaore moud, toch

veer höbbe al zo lang gewach

...

 

oet gaon aete deig me vruiger           

mit de kènjer of ós vrunj                     

kaarte bie ei glaeske beier                  

bie Schtad Zitterd, Gats of Kup          

 

op vakans mit bös of vleigtuug

gans wied weg nao zee en zón

mit de Kip of mit de Hobby

wit geer nog wie dat doe góng?

...

 

aeve dènke euver vruiger

geuf mich dèks ein goud gevuil

bèn dan weg van leid en elenj

dat wurt michouch waal ‘ns teväöl

 

laot veer haope dat al gans vlot

alles wurt wie veur twee jaor

dat veer helop zègke, sjreve:

veer zeen mit corona klaor!

 

 

141021 (c) John HertogH

 

====================

wie geit ‘t ?

 

laeg zeen de sjtraote

mit gesjlaote gesjefter

 

laeg zeen ós restaurants

mit  laeg beusje en kassa’s

 

laeg zeen de café’s

mit gans laege sjpaarpöt

 

laeg is de mert

mit 'ne einzame krisboum

 

’t waere sjtil krisdaag

Sjtille Nach

 

wie geit ’t wiejer?

 

271120 ©johnhertogh

==================

berg van puin

 

gebraoke sjtein

gemale sjtein

gruus en sjtöb

 

weg alle buik

weg elpees, ceedees

weg insjtremènte

 

geneit van de sjtilte

pès de volgende

laege wage kump

 

261120

====================

van waer en wèndj

 

in deze vraeme virustied

raak ich mien weurd mer lestig kwiet

ich wil gaon dichte zónger kul

dit waer dat maak mich richtig dul

 

vlot doon ich alle vinstesj toe

mer bènne vènj ich gaar gein roe

dao boete sjteut de zoere wèndj

gedreeg zich wie ein duvelskèndj

 

de sjeem dae haet zich vlot versjtaoke

blaw lóch die is al aan ‘t kaoke

te väöl bewaege doon ich koum

mer oet mien ore kump toch sjtoum

 

ich rös hie op ‘n benkske oet

en tèl de sjträölkes op mien hoed

dat geef mich moud óm op te sjtaon

noe kèn ich lankzaam heivesj gaon

 

‘n hómmelsjoel kump van gans wied

die bringk verkuiling sjus op tied

en es ich thoes kóm aeve later

verwilkómp mich ein forsj geklater

 

de radio sjteit op ‘t waer

dao loester ich jao dèkser haer

Piet Paulusma dae maak mich blie:

d’n  taegewèndj is noe veurbie !

======================

Pappegejke    Thur Laudy  1973

 

Pappegejke, och vertèl mich

zèk mich toch èns waats doe wits,

alles heurs te, alles zuus te,

ouch es doe in ’t keujke zits.

 

Went de “Wieze Raod” biejein kump

Vorst Marot ei veursjtel deit

wits doe, awwe sjlatevogel

jus precies wo óm ’t geit.

 

Wurt dan dao de prins gekaoze,

wo zich jederein op sjpich,

heurs te ziene naam ouch nuime,

ummer hilsj te dat veur dich.

 

Geit de vastelaovend kómme,

en doe sjnoefs al get d’r van,

bès te jus zo gek es veer zeen,

gekker nog es “Lómmel An”

 

Sjpeelt dan oos kapel ’t leidje:

“Jao, dao is de pappegej”,

zènge veer zo hel v’r kènne:

Allenej, jao allenej.

 

Sjleit ’t daensdig twelf oere,

en de maskes gaon dan aaf,

sjreefs te veur ’t allerhelste,

mit ein heisje sjtöm “Alaaf”.

 

Zuus te esjelegounsdig mörge

hering oppe taofel sjtaon,

zits te sjtil te koekeloere,

wits te dat ’t is gedaon.

Gister haws te nog z’ón laeve,

es te de verkleide zougs,

op ’t sjtekske waars aan ’t danse,

en nog mit de vleugels sjlougs.

 

Noe zits doe dao in ’t huikske,

höbs te ’t äörtje dèks versjlók?

maak toch weier èns get laeve,

luch die köpke toch ‘ns op.

 

Drie daag zeen veurbie gegange,

daag van sjpas en van plezeier,

pappegejke, blief neit troere,

’t anger jaor kómme ze weier.

 

 

Thur Laudy 1886-1975

 

mien modesjtaal

 

vastelaovend, sjötterie,

maas en jeker, hermenie

vruiger mót d’r ummer bie

en aw weurd make ós blie

 

bie de awwesj en de poete

zit modesjtaal  jao in de kaer

mer doog neit de ouge sjloete

veur de welt róndjóm ós haer

 

ós taal die is jao gans gesjik

veur weltnuuts en de polletik

‘t óngerwies dat leet ós valle

 dao wilt me niks es Èngelsj kalle

 

die taal van ós is gans uniek

jus wie de sjone blaosmeziek

wienee is ’t sjtechele noe gedaon

laot’ veer op ein lien gaon sjtaon

 

euver sjport, I.S. en plichte

en ouch euver minsjerechte

kèns te goud in ‘t Limburgs sjrieve

me mót daoróm neit zaege blieve

 

blif dan veur ós allein nog sjtaon

-want ós Limburg is zo sjoon-

mit de pen vas in de handj

sjrieve euver ’t heuvellandj ?

 

waat ‘ne zeiver, waat ‘ne praot

daovan waer ich toch zo kaod

want…van rechsjpraok  pès toneel

is Limburgs multi functioneel!

 

 

Zitterd dec2019© johnhertogh

====================

aafsjeid van 2019

 

me zaet ‘t toch zo dèks:                                   

’t jaor is ómgevlaoge                              

veur d’eine mit kedoos                  

veur d’anger gans bewaoge                  

 

dit jaor is väöl passeierd                        

woveur me zich mót sjame:                    

vastelaovend, sjoon traditie,                  

ze wille neit mee same!                          

 

ouch in de polletik vandaag

watsj me zich óm de ore

dao is mer eine gouwe raod:

kóm oet d’ ivore tore

 

op sjportgebied, ojee, awee

geit ’t ouch al neit bergop

noe pak uch toch èns same

’t wurt angesj eine flop

 

‘t liek ’n gans groot drama

waat ich uch hiej vertèl

mer laote veer toch haope

dat ‘t verangert en gaer sjnel

 

veur viefenzevetig jaor                           

doe woort ós sjtad bevried                     

óm dat nooits te vergaete                      

herdachte veer daen tied                       

 

veer sjtónge sjtil bie jaore trök

mit sjone zank en blaosmeziek

jónk en awd waar ’t gans èns

dat kènt dus ouch, zo wie noe bliek

 

ich höb mer eine wunsj veur uch:

versjtaot uch in ’t nuje jaor

want dao haet jederein get aan

dat is toch zeker waor !!

======================

 

Sjmakelik

 

sjrieve is sjus  wie kaoke

dat deis te neit veur dich allein

doe haops toch ummer

dat ’t jederein zal sjmake

 

‘t vink aan mit ’n woord,

’n  idee, foto of ein veurval

mit dèngskes en  dènke

kieke mit de ore

loestere mit dien ouge

fluustere mit dichzelf

 

doorsjtraepe, sjejje en vlouke

weier opnuuts aanvange

en blieve perbeiere

 

weier opnuuts aanvange

en blieve perbeiere

 

gedichter mós te pruive

en verhaole opsjnoeve

 

sjrieve is sjus wie kaoke

 

 

080819©johnhertogh- zwentibolddichter

==========================

benkske

’t benkske haet nog ein plek vrie

en neud mich vrunjdelik oet

doog mit ós mit, kóm zèt dich hie

bedènk dich neit, besjloet

 

nuujsjierig  zèt ich mich dan neier

en sjtèl mich veur, zo wie ’t heurt

krieg ’n segaar, drènk ’n glaas beier

gaef runjdje , waat neme sjteurt

 

moele euver ‘t waer en vrouwluuj

en kwatsje euver polletik

d’r wurt gevlouk: godnondedjuu

zo hel, dat me d’r zelf van sjrik

 

ich kiek soms euver miene bril

en sjtèl dan vraoge van mien eige

de bank die vilt dan aeve sjtil

mer geit vlot wiejer dan mit leige

 

es de zón zich geit versjtaeke

sjtaon v’r allenej g’liek op

eine blif nog ummer kaeke

…

dae haet te väöl segare op!

 

14619©johnhertogh-zwentibolddichter

=======================

verdouf dörp

 

zóndigdemörge

de sjtraote zeen laeg

kirk die zit vol

gelouf is hie groot

 

loewende klokke

de mès die is oet

mit zóndigse kleijer

aan op nao café

 

’t dörp ruuk nao sop

en wagkelentaere

vindj me zien heim

en kalt get te hel

 

druim ich noe van

vieftig jaor trök

nae, dit is vakans

mer drie oer van hoes

 

zóndigdemörge

sjoon dörp aan de saar

danke und tsjüüss

 

260619©johnhertogh

------------------------------

gans gruin, gedich mit de zachte g

                    

gaelgruin* is toch

ouch bekans gans gruin…

 

op ‘t gruine graas wurt waekeliks

gevóchte door ‘ne  greutsje gróp

mit groot geluif en meistes

zónger väöl gevreigel of gebragkel

dèkser ouch mit get gelök

dat mót dan waal gezag waere

 

natuurlik is ’t geweun

ein groot geldjgesjef

mer

dao wurt gemeinlik

goud en gaer euver gezjwege

 

zeet geer noe getraoje

of zeet geer gruin van sjaloezie

of wurt ’t uch gruin en gael

veur de ouge

 

gein gezeur ezzebleif

‘t is genóg gewaes

niks gedöldj höbbe

gaef gaas, gank d’r veur

griep eur gelök

en geneit

gaer gedaon

goal !

 

*gaelgruin, de kleure van fortuna-zitterd

 

-----------------------------------------

benkske

 

’t benkske haet nog ein plek vrie

en neud mich vrunjdelik oet

doog mit ós mit, kóm zèt dich hie

bedènk dich neit, besjloet

 

nuujsjierig  zèt ich mich dan neier

en sjtèl mich veur, zo wie ’t heurt

krieg ’n segaar, drènk ’n glaas beier

gaef ouch ’n runj , waat neme sjteurt

 

moele euver ‘t waer en vrouwluuj

en kwatsje euver polletik

d’r wurt gevlouk: godnondedjuu

zo hel, dat me d’r zelf van sjrik

 

ich kiek soms euver miene bril

en sjtèl dan vraoge van mien eige

de bank die vilt dan aeve sjtil

mer geit vlot wiejer dan mit leige

 

es de zón zich geit versjtaeke

sjtaon v’r allenej g’liek op

eine blif nog ummer kaeke

…

dae haet te väöl segare op!

 

14619©johnhertogh-zwentibolddichter

------------------------------------------

effe sjejje

 

doe bès ’n richtige batteraaf,

bäökbees, flabbes, kleine kräötsj,

gekke läöres, deugeneit,

krawwel, koetnaas, moelejan,

mótskop, kwatsjbaer, gloeieling,

milkmoel, kröppel, zeiveraer,

kuke, dóm sjaop, breuzelaer,

vrechlap, vlaegel, grieniezer,

kaffer, kaojóng, leugebees

votlaok, lapsjwans, nötterik,

doe blote batsegezich!

 

mei 19©johnhertogh-zwentibolddichter

=================

 

mei 2019

’t guitje is noe wie gelek

de benk zeen flink  gesjoerd

en alle sjtuil zeen sjoon gebeits

d’n haof krig  ouch ein beurt

 

vruig veugel  in de kaanjele

’t zunke neit mee sjoe

nuuj blaedjes in de broene beuk

de geur van… barbecue?

 

’t vruijaor zit goud  in de lóch

dat kèns te vuile, zeen

ich wil nao boete, ich wil d’roet

dao bèn ich nooits allein.

 

 

mei 2019© john hertogh-zwentibolddichter

 

=======================

positief

 

zap ‘t nuuts noe effe weg

de gezèt kump sjtraks waal oet

nae, ich sjloet mien ouge neit

sjtaek de kop neit in ’t zandj

 

kiek nao baove in de lóch

zuik nao haop en ouch get sjteun

want ’t is neit mee zo sjoon

alles liek opèns zo kawd

 

dènk mer dèkser positief

zuug gein baere oppe waeg

blief geluive in de jeug

‘al kump goud’ is geine druim

 

es noe jederein veur zich

mit de anger raek’ning hiltj

en oug dèkser mitein kalt

zuut de welt gans angesj oet!

 

                                               johnhertogh-zwentibolddichter

========================

grieke

 

nums doe ouch ’n aperatief

of geiste metein veur dat sjtök bief

 

gia mas, proost, d’n eesjte ouzo

en dat wurt al gaw ein trio

hellenique sjpeelt de sirtaki

aoh, dao kump alvas tztaziki

 

mit ein sjäölke lekk’re gyros

dat herinnert mich aan rhodos

brèng ós mer metein moussaka

en ouch gaer ‘n flesj  retsina                 

. . .

nao die sjmake en die geure

kiek v’r nao die sjoon likeure

wurt ’t toch ein glaas kumquat ?

 

laot mer, ‘ch höb genóg gehad.

                       

120419@johnhertogh-zwentibolddichter

 

=======================

lekker zunke

 

énjtlik bès te weier dao

veer höbbe lang op dich gewach.

door dich kump laeve oet de aerd

höbs doe nog mee mitgebrach?

 

mien gezich vink aan te pitsje

krieg opèns ein werm gevuil

toch mer sjuve nao de sjeim toe

patsj kènt aaf,  dao is ‘t kuil

 

druime van ’n lekker pilske

mit ‘ne fejne kraag van sjoem

of ein kawd glaas witte wien

jao, lek vinger en lek doem.

 

es ’t sjtraks weier sjeem’re geit

en de vlaermoes zich leet zeen

 blief  ich lang en sjtil hie zitte

 vuil de rös van kop pès teen

 

april19(c)john

========================

maak tied

 

ummer ómgang

mit alles

ummer wirke,

ummer drök

geinen tied

veur femieje,

naoberluuj

vrunj of kènnisse

. . .

kiek ’s óm dich haer

dao is väöl mee

doog dien ouge aope,

wied aope,

maak tied

veurdat d’n tied,

dienen tied,

óm is.

 

april19 ©john

 

=====================

kiekoet  *      

 

rechs louge de teikensjpulle

góm, pensele hel en zach

sjere, beusjtel en óntvètter,

sjtreepbehang en terpetien

kwaste, vètkriet en ouch plekbandj

verf en ink en sjetspepier

lènks de sjlók, de wienbel, rood

salmiak en zjwart-op-wit

belga kawgóm,  oukouksjtaefke

nogablökskes en zuithout

ouch de flesje vól mit zoerböl

zeen gans dóf, vergaete, laeg

achter glaas gebleikde fotoos,

mee es ’n herinnering.

 

2019©johnhertogh - zwentibolddichter

 

(*kiekoet=etalaasj)

=======================

 

VASTELAOVEND   (’n acrostichon)

Veer zóchte nao kojbojs en waore zelf indiane

Allemaol op jach wie de richtige Mohikane

Sjeite en sjloepe door sjtraot, gats en paad

Taenge de doosj 'n flesj priklimmenaad.

Ein pekske dat maakde de mam flot van zek

Langs bókspiepe woorte get fraanjele geplek.

Allenej haw’ veer metser, bäög en biele

Ouch sjneje veer zelf oet witse de piele.

Vastelaovend oet mien jeug, da’s zo lang gelee.

En zoget vergits te van ze laeve noots mee.

Nemes, nae nemes nump dat van mich aaf

Daoróm roup ich drie maol  hel: “ALAAF!”!

Kolleberg

 

 

de kruutswaeg                                  langs de zeve voutvel                       löp nao baove                                  pès aan de kapel 

de duuster gats geit lènks               de holle waeg ómhoog                    ’t gevreur zit allein nog in de lóch  kleur op de bakke                           pratsj aan de vuit

de eenzame wanjelaer

zunk Jochems leidjes

van zefke meols pès 't krutske,

van zjwerbelke pès treeske

aaf en toe wurt hae óngerbraoke

door ein vluch verrasjde veugel

opgejaag door 'ne sjpeurende foks

langzaam wurt 't sjtil 

 

dec 2018(c) john

====================

Naojaorsbeelde

 

ich zeen en ruuk

en vuil de herfs

heur fluust’rende wèndj

tel krakende tek

blaedjes dwarrele

en sjarrele tösje
gerooide maïs in de

pratsj van de baek

 

griesgraw gawze

vleige nao ’t zuje

nao dae platte sjtraep

van wiedeweg

 

‘n dunne dèkke
van dampige lóch

sjtieg lankzaam op en

vlug traog de veugel nao

 

de doje maelder hink vas

inne geknakde kale sjtroek

op ‘ne sjmale einzame paol
lek de ruiver al zien luppe…

======================

ummer mee

gans lang gelee

doe loug de bieb

die van mien jeug

in ’t patronaat

 

‘t eesjte bouk

dat ich dao lous

waar van Dik Trom

mer ich wól mee

 

van Arendsoog

pès Pim Pandoer

van Biggles en

Kameleon

 

de rieje dao

mit kènjerbuik

die woorte sjmaal

ich lous gans sjnel

 

ze kènde mich

dao in die bieb

en hólje dèks

al buiker vas

 

mien patronaat

waar flot te klein

‘ch góng mit de fits

de sjtad doe in

 

de buik die ich

van dao mitbrach

beveile mich

waek in waek oet

 

en saer daen tied

zeen buik mich leif

’t sjmaak nao mee

jao ummer mee

 

 

© johnhertogh - zitterd

+++++++++++++++++++++++

weka voetbal

 

gein hends

zaet de

video sjeids

 

wienee  kriege

veer zo emes

 

veur vraem besjlssinge

veur vraem oetsjpräök

veur al dat ónrech

 

erm vmbo leerlinge

erm voetballesj

 

29-06-18 © johnhertogh

 

=====================

Tour de France

 

 

sjone sjnelle sjport

 

roukende reklamewages

mit hónderde petjes

en plestik prölle

 

weggesjmete drènkflesje

laeg drinkgelletjes

vervoeling euveral

 

rónkende  wages

sjtinkende  moters

kwalmende helikopters

 

gelökkig geef ‘t nog

geine geurtelevisie

 

nao veure Dylan

nao veure Tom

 

sjone sjnelle sjport

 

 

2018©johnhertogh

 

===================

versjtaot uch

 

wie water en vuur

wie chóklaad, mèlk en puur

wie nao veure Fortuna

en los joa van kloeb Roda

 

wie water en vuur

wie Kolleberg en Côte d'Azur

wie babbelaere, zuit en zoer

klein aerpel en kóntente boer

 

wie water en vuur

wie gans billig en paeperduur

wie werm beier en kawwe wien

wie zeker en nog neit mesjien

 

 

wie water en vuur

wie drank en óntwènningskuur

wie dominee en meneer pesjtoor

wie hardrock en gemenk koor

 

wie water en vuur

wie de trainer en besjtuur

wie Trump en dae Poetin

wae geluif dao nog in?

 

versjtaot uch.

 

 

vuil ‘t vruigjaor                      

 

ich zeen

de eesjte krokusse

gael  en blaw

tösje de lètste sjnei

ich ruuk

ein zachte sjoel raege

die de aerd plaog

gans aeve mer

ich heur

wie de veugelkes

zèngentaere sjnäöre

van sjtroek pès boum

ich pruif

wie de vreche eikhoorn

zich tegoud deit

aan de toevallig trökgevónje neut

ich zeen

wie de eesjte kroenekrane

mit kreftige sjlaeg

hoog euvervleige

ich vuil 't vruigjaor                            

 

 

meert2018©john

===================

gedanke in de Patesjkirk

 

Lang geleje zóng ich hie in ’t mannekoor

Wae waar doe ouch weier meneer pesjtoor?

 

‘t Gregoriaans waar mich neit ónbekènd

in Albaers kleske woort’ veer daomit verwènd

 

Rippeteiere deige veer baove, in dae zaal

en zènge, bie d’n órgel, op ’t oksaal

 

Ich weit dat de note op veier lienkes sjtónge

en ouch dat veer jaorliks op koorreis gónge

 

Ein sjoon kestuum woort mich aangemaete

en dan op reis: sjpas, beier en goud aete

 

’t Nondedjuke bleef nooits rechóp sjtaon,

waafer muite ich daoveur ouch höb gedaon

 

Veurdat ein mès goud en waal waar begónne

hawwe veer al väöl sjoon sjtökker gezónge

 

Ich fantaseierde dat ich zóng en sjpeelde

mit die grote, zo vertroewde heiligebeelde

 

Mit de Heilige Rosa en mit Sint Katriena

die koum, lous ich later, wied weg oet Siena

 

Toch mót ich mich ei bietsjke sjame:

höb niks gesjreve euver glaas in lood rame

 

Want taengeneuver ’t beeld van Heilige Blasius

vèndj geer ein sjoon raam van Sint Ignatius

 

Veural es dao ‘sjmiddigs de zón vol op sjeen

gouf en geef ’t  dao väöl sjoons te zeen

 

Wiejer bèn ich väöl vergaete of gans kwiet

trök nao de Patesjkirk ? ich gluif ’t wurt tied

 

jan2018© johnhertogh

 

=====================

zjwieg

 

de waeg

waar nog naat

mer de zón

sjpouwde zich

om ‘m te dreuge

de percessie

begoosj te trèkke

meneer pesjtoor

leip gans veuraan

d’n daeke góng neit mit

sjtóng waal

mit de maad

in vol ornaat

ónger de paort

drie kènjer

hónge aan de rok

van häöm

neit van häör

ei beeld

dat me

noots vergit

 

ziene pap haet ‘r

noots gekènd

zaet ‘r

d’n daeke

des te baeter

 

zjwieg noe mer

 

meert2017©john

=========================