'

Óm de twee/drie waeke sjteit ein sjtökske in 't Zittesj van mich veur uch mit d'n titel:  van KUL pès KULTUUR op dees site mer ouch op mien Feesbouk en op de mail van luuj die 't sjtökske op hun eige mail wille kriege. 

========================================================================

==========================================

De lèste van 2022:

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   20                              20 december 2022

Krismes en mee…

Krisboum

Veer höbbe al jaore dezelfde krisboum. Neit oet d’n haof mer van op ózze zölder. ‘t Kos get muite óm häöm via de vlizotrap nao ónger te kriege, mer dat höb ich d’r gaer veur euver. Zo eine kunsboum haet toch zien veurdeile. Ich houf neit jeder jaor mit de wage ‘ne nuje boum te gaon koupe. Sjpaart benzien en oetzuiksjtress. Natuurlik ruuk ózze boum neit nao boete, mer ich höb  ouch gein las van naolje in de bak van de wage of in de kamer, ich houf ‘m gein water te gaeve en kèn ‘m zo lang laote sjtaon es ich mer wil. Meistes pès Driekeuninge!

Krissjtal

Behawvw Maria, Josef en ’t kèndj, höbbe veer natuurlik ouch ‘ne os en aezel en  get sjepesj mit sjäöp èn de drie keunige. Oorsjprónkelik hawwe veer geine kemeel en ouch geinen èngel. Oppe Weihnachtsmarkt in Aoke höbbe veer die gevónje. Allein… de kemeel is ‘ne get klein oetgevalle dromedaris gewore en d’n èngel mót ich mit ‘ne satéprikker vasmake, dae wilt waal ’s dèkser valle. ‘ne Vallende èngel bèn ich nooitsj in ’t krisverhaol taege gekómme, ein vallende sjtar waal! Veur de sjepesj en ’t vee höbbe veer nog ein flikkkerend lempke gekoch, dat ein vurke mót veursjtèlle. De drie keuninge en de kleine dromedaris sjtaon get op afsjtandj sjeloes nao dat vurke te kieke. Mer hunnen tied kump nog.

Krisleidje

Veer kènne ’t leid allenej en in dezen tied is de kans groot dat veer ’t zènge. In 2018 waar ‘t 200 jaor geleje dat ’t leid veur de eesjte keer gezónge woort: in Eusteriek! ’t Is in 300 tale en dialecte vertaald en daomit ein van de meist populaire krismes-leidjes. Op eesjte Krisdaag 1818 woort ’t leid , gecomponeerd door Joseph Mohr en Franz Gruber, veur ’t eesj oetgevuierd in waat noe de Stille Nachtkapel is in Obendorf, vlak bie Salzburg. ‘t Woort begeleid mit ein gitaar, volges de verhaole koum dat ómdat de muus aan ’t kirkórgel hawwe geknaag! Mesjiens kump uch dit verhäölke bekènd veur. Dat kènt kloppe, want ich höb ’t al ’s eerder gebroek. Zuug ’t mer es ein kristraditie…

(Kris-)wunsje

 Ich wunsj alle laezesj van mien sjtökskes, verhaole en gedichter alvas sjoon, röstige

Krisdaag, ein gouwe roetsj en ein gelökzelig 2023.  

===========================================================================

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   19                              29 november 2022

Dits keer get mee kultuur es kul…

Sintermaerte, 11e van de 11e, de oetruiping van de vastelaovesprins, de Sjtoumcursus van Veldeke en de presentatie van hun nuutste buikske in ’t Zittesj, de geweldige Revuu in ’t Toon Hermans theater, ’t hoes wiejer verseiere, aaf en toe ’t waereldkampioensjap in Qatar… ’t Löp mich waal allenej ein bietsjke doorein. En bènnekort, op 1 december, óm 20:00 oer ’t Groot Zittesj Dictee in de Vief Heringe. En vanaaf hawf december de Wèntjerdruim in Zitterd, dit jaor jaomer genóg zónger sjaatsbaan. Ich herinner mich nog dat in 2013 mien gedich oppe sjaatsbaan geprojekteierd woort:

 

de wèntjerdruim in ós awd zitterd,

wo alles zo fejn blink en glittert,

wurt ummer opnuuj

bezóch door väöl luuj,

die drènke en aete,

’t leid wurt vergaete,

veur aeve, want neit alles sjittert,

ouch neit in ós awd sjtedje zitterd.                                                                                     

 

In daen tied rómmelde ’t ouch al in de welt, allein neit zo lang achterein en zo verrèkde kortbie. Mer ich höb eine postieve kaer en ich geluif dat  ‘r mee gouds es sjlechs op oze welt besjteit.

 

zap ‘t nuuts noe aeve weg, de gezèt kump sjtraks waal oet

nae, ich sjloet mien ouge neit, sjtaek de kop neit in ’t zandj

kiek nao baove in de lóch, zuik nao haop en ouch get sjteun

want ’t is neit mee zo sjoon, alles liek opèns zo kawd

 

dènk mer dèkser positief, zuug gein baere oppe waeg

blief geluive in de jeug, ‘al kump goud’ is geinen druim

es noe jederein veur zich, mit de anger raek’ning hiltj

en oug dèkser mitein kalt, zuut de welt gans angesj oet!                                                                                                                                            

Veurdat ich ’t vergaet: Die nuutste oetgaaf van Veldeke Krènk Zitterd lik in de Zittesje boukgesjefter Krings, Flow en Speels: ’t Zittesj ABC veur kènjer. Ein sjoon kedoo veur de jóngste kènjer, hun awwesj en oma’s en opa’s. Ouch get veur in de sjoon of ónger de boum!

Pès de volgende van KUL pès KULTUUR.  Mit de kómplimènte, © John.

==========================================================================

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   18                              8 november 2022

‘t Kènt neit op, weier eine feesmaond.


Intösje is ’t november. De meiste blaar zeen van de buim aaf en nao de blajerkörf gebrach of door de gemeinte biejein of oetrein geblaoze en mitgenaome. Dat blaadrume brink de naoberluuj waal weier korter biejein. Ouch al wurt d‘r waal ’s geknoterd euver die blajer, körf en buim. Me zuut mekaar in jeder geval waal dèkser boete.

November is toch ouch weier eine feesmaonj.  De Oktoberfeeste zitte d’r op. Bèn aeve d’r aan gaon sjnoeve. Prachtig. Waat ein fees, waat ein organisatie, waat ein werk! Chapeau. Halloween, dat geïmporteierd Amerikaans gruwelfees, nae  dao höb ich niks mit. Dus noe flot wiejer nao de volgende feeste: Sint Maerte, op d’n 11e  van de 11e, tegeliek mit d’n  aanvank van ’t Vastelaovessezoen,  en daags d’rop de oetruiping van de nuje sjtadsprins van de Marotte, veur ’t eesj maol oppe Mert! Bèn benuud. En dan kump ouch nog d’n intoch van Sinterklaos, mit of zónger richtige Zjwarte Piete. Mer ich höb mich veurgenaome euver die lètste neit mee te sjrieve! Ich dènk gaer trök aan de ‘gouwe ouwen tied’ …

Vanaaf 19 november lik de nuutste oetgaaf van Veldeke Krènk Zitterd in de Zittesje boukgesjefter Krings, Flow en Speels: ’t Zittesj ABC veur kènjer. Ein sjoon kedoo veur de jóngste kènjer, hun awwesj en oma’s en opa’s. Ouch get veur in de sjoon of ónger de boum!

Dan zeen de uig inmiddels gerich op de Krismes. Ich bèn ouch al ’s gaon kieke nao de versjeije ‘krismes-shows’ in tuincentra, veural óm nuuj ideje veur thoes op te doon. Want wie de meiste van uch waal weite, zètte veer óze krisboom gans vruig op en laote ‘m ouch gans lang sjtaon, óm zo lang muigelik d’r van te geneite. De eesjte jaore wie veer dat deige, vónje sómmige naobere en wanjelaesj die langs leipe dat get vraemp en deige veer de gerdiene mer get vruiger toe. Mer saer ‘ne ganse tied al trèkke veer ós dao niks mee van aan. En wie ich zo heur en zeen, höb’ veer toch al gans get luuj aangesjtaoke. Waat dat aansjtaeke betruf:  In verbandj mit de energie zal ich waal get krisboumlempkes gaon vervange door ledlempkes en waarsjienlik ouch mee kaerse en theeleichter laote brenne!  Ofsjoon me sjrif dat dat weier neit zo gezóndj is veur de lóch in hoes… Waat noe gedaon? Lang, gans lang geleje hawwe veer richtige kaerskes in de krisboum…

Pès de volgende van KUL pès KULTUUR.  Mit de kómplimènte, © John.

===========================================================================

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   17                              18 oktober 2022

Oktober - Sjtoptober - ober!

28 Daag neit rouke. Dat is de opzèt van de actie sjtoptober. Mee es de helf van daen tied is al veurbie. Ich vènj ’t ein sjoon actie, mer ’t is niks veur mich. Woróm neit? Ich bèn al z’ón  veertig jaor geleje gesjtop mit rouke. Veur vief jaor trök sjreef ich dao ouch ein sjtökske euver. Hie kump ’t nog èns :

“Naeve mich heurde ich opèns ei vraemp geluid. Ich dach eesj dat ’t eine rollator, kènjerwage of hóndjskar waar, mer ’t bleek eine awwe rolsjtoul zónger meuterke te zeen, dae veuroet geduud woort door eine nog awwere man mit ein dikke, dampende sigaar. Agio of Willem II, dach ich te ruke.

Deig mich dènke aan gans lang geleje, wie ich begoosj mit rouke. Eesj maakde veer ós sigrètte van de sjtumpkes die v’r zóndigs nao de hoogmès opraapde oet de ziep; later kochte v’r de Dame Blanche per sjtök. Daonao woort ’t sjek: zjwaore Van Nelle en DRUM, dan Caballero en Stuyvesant en ouch nog roje en blawwe Gauloises. Nao de piep mit Clan - jao, oet dat geroete pekske - höb ich versjeije segare geperbeierd. Daoróm twiefelde ich noe tösje Agio of Willem II.

Wie óze awdste zoon ei jaor of ach waor, woort door zien sjooljóffer vertèld dat rouke zo óngezóndj waor. Wie hae mit dat verhäölke thoes koum, brach hae dat zo euvertugend – ‘van Pap höbbe veer neit lang, dae rouk zich krank’ - dat ich al mien piepe, segrètte, shag, vloeipepier enz. metein höb wegge-sjmete en saer daen tied höb ich noots mee gerouk.

Dat góng mich door de kop wie ich de rouk van die dikke sigaar rook. En toen pas zoug ich ouch wae in de rolsjtoul zout. Ich sjrók van de sjlengskes die van de naas nao de zuursjtóf flesj leipe. Ich sjrók  nog mee wie ich häör herkènde: ’t Waar de aw sjooljóffer van miene awdste zoon…”

Dao mous ich vandaag weier aan trökdènke. Sjtoptober, ein gouw actie. Euveriges, oktober haet natuurlik nog väöl mee dat intressant is. Óm te beginne: ‘t Grootste naojaorsfees van ’t zuje: Oktoberfees in Zitterd, van 21 t/m 26 oktober. Mer dao höb ich ouch al dèkser euver gesjreve, dat doon ich noe mer neit. ’t Blaad is ouch al bekans vol! Sjus wie de blaadkörf die euveral geplaatsj zeen. Ich wunsj uch eine ‘Goldene Oktober’. En zo wie ós naobere euver de päöl ’t zo sjoon kènne zègke: Auf geht’s.

Pès de volgende van KUL pès KULTUUR.  Mit de kómplimènte, © John

==========================================================================

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   16                              27 september 2022

Naoberdaag en anger daag.

Jaore geleje krege veer ‘nuuj luuj’ in ós aw sjtraot. Die besjlaote óm op ein orgineel maneier de sjtraotgenote oet te neuje óm kènnis te make. Op de plej woort ’t eesjte buurtfees georganiseierd. Waat mit z’n tweeje is begoosj is noe oetgegruijd tot ein jaorlikse (behawve in de coronatied natuurlik) biejeinkóms, nog ummer op dezelfde plej. De organisatie is in de loup der jaore verangerd (verjónk) en oetgebreid en intösje is ein tweede sjtraot ouch al aangesjaove.  Awd en jónk tref zich bie de sjtehtische of zèt zich op ein van de väöle gereid gezatte sjtuil.  Es raenge wurt veursjpelt wurt ein fórsje tent opgezat! Noe ich dit sjrief zeen ich dat ein ‘mager’ zunke aanvink de sjiene. (Geef ’t ouch ’n dikke zón?) D’r wurt kènnis gemaak mit nuujkómmesj, väöl vertèld, aaf en toe gevreigeld, väöl gelache en ouch waal sjtilgesjtange bie naobere d’r neit mee bie zeen. D’r wurt gedrónke (jeder mót zien eige glaas mitnumme) en gegaete en veur de jeug wurt ouch goud gezörg. ’n Sjprèng-kösse en sjminke sjteit ouch dèks op ’t pregram. En vergaet neit de sjlóktaofel. Nao aafloup zeen d’r ummer väöl henj die mithelpe óm al op te rume. Jónk en awd versjteit zich. Veer höbbe geine mr. Frank Visser neudig! Laote veer haope dat dat zo blif!

Nao ’n tiedje kriege veer ein ‘versjlaag’ van de middig in de breivebös, meistes mit foto’s en ein ganse lies van achtergelaote of vergaete glazer, kuilboxe of sjtroumkabele. Allewiel wurt ouch ein en anger op Feesbouk gezat. Óp nao volgend jaor, dus. Landelik wurt daen daag ouch gevierd. En Douwe Egberts en ’t Oranjefonds sjtimuleiere dat. Mit of zónger kaffe. Buredaag, op zien Zittesj: Naoberdaag.  Dit jaor bie ós oppe plej op zóndig 25 september jl.                                                                                                            

Mer ’t geef ouch nog angere sjpeciale daag en ouch daag wo ich nog noots van geheurd höb: Lènkshenjige daag, Sjoonmoderdaag en neit te vergaete La Tomatina, de daag van ein tomategevech in ’t Sjpaanse Buñol. Wie zoget óntsjteit? Get sjnake wólle mitdoon aan einen optoch. Ze krege ruzing en ómdat ze in de buurt van de gruintekraom sjtónge pakde ze tomate en sjmete die nao d’n optoch. Van ’t ein koum ’t anger en noe is ’t ein grote toeristische attractie. Tomate waere zelfs oetgedeild aan de toeriste. Mee es 100 ton tomate, laes ich. Nao aafloup is ’t ganse sjtedje rood. Zunj van die tomate, toch?          Gaef mich mer Naoberdaag.

Pès de volgende van KUL pès KULTUUR.  Mit de kómplimènte, © John

============================================================================

 

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   15                              6 september 2022

Doe höbs luuj en perpluuj 2.0

D’r zeen van die dènger die ich noots gans höb begrepe: die zogenuimde ANWB-sjtèlle, beveurbeeld. ’t Toppunt van gemeinsjappelikheid. Geer kènt ze waal: wanjelsandale, zökke, aafritsbóks, fleece wèndj-jack, kakikleurig humme, häöptesj en loupsjtekke en allenej in uni-look, of wie me dat vruiger zag: percies ‘t zelfde. Twee veur de pries van ein. Allein haet hae maot 54 en zie mäötje 40. Eerlik gezag: gein gezich. Mer… jeder ziene zin toch? En dat is toch allein mer de de boetekantj van die sjtèlle. Doe kèns se waal veur de kop kieke mer neit in de kop. Ich dènk waal hae de wanjel- of fitsroutes haet oetgezóch en de navigatie haet ingesjtèld;  zie de bótramme mit dreugwoosj gesjmeerd haet en de döbbelwandige IKEA thermoskan mit heite kaffe. Veural de kuikskes neit vergaete, want oetraste op ein benkske is  gouwekouper es op ein terras ! Mer erger vènj ich ’t es ein koppel ‘uni-look’ gedanke haet en die ouch nog ummer oetsjprik. Dan krigs te dèks de volgende ' conversatie’: “Nae, véér hawte neit van deze meziek, hè jóng” of “Veer vènje dat neit lekker” en  “Nae, dat is niks veur ós” of “Zoget doon veer noots” en   “Veer kieke dao neit haer, hè leive”, wobie de leive braaf jao knik of get ónversjtaonbaars mómpelt… ’t Liek esof me daodoor gein eige meining mee haet en dao ouch nog greutsj op is. Natuurlik is ’t fejn es me ’t dèks mitein èns is, mer ’t liek mich gezóndjer es me ouch meiningsversjille haet. En dao dan waal mit respèk mitein euver kalt…

Ich haop neit dat ich mit dit sjtökske luuj oppe (wanjel-of fits-)tene höb getrap, mer noe wit geer in jeder geval wie ich d’r euver dènk.  Noe zulle d’r waal luuj zeen die dènke dat ich sjeloes bèn op die ANWB-sjtèlkes, mer ich mót uch teleursjtèlle. Veer - mien vrouw en ich -  höbbe waal ’t zelfde mirk wanjelsjoon, mer gans versjillende kleur zökke, versjillende sjtekke, ich ‘ne rangerhoud, zie ein zónneklep, enz. en es ’t aeve kènt zuike veer ’n gezèllig terras op. Euveriges, ich bèn waal lid van de ANWB! 😉

Jedere geliekenis mit besjtaonde luuj of gebeurtenisse beröste gans op toeval en kómme gans oet de laevendige fantasie van de sjriever!

Pès de volgende van KUL pès KULTUUR. Mit de kómplimènte, © John

==========================================================================

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   15                              6 september 2022

Doe höbs luuj en perpluuj 2.0

D’r zeen van die dènger die ich noots gans höb begrepe: die zogenuimde ANWB-sjtèlle, beveurbeeld. ’t Toppunt van gemeinsjappelikheid. Geer kènt ze waal: wanjelsandale, zökke, aafritsbóks, fleece wèndj-jack, kakikleurig humme, häöptesj en loupsjtekke en allenej in uni-look, of wie me dat vruiger zag: percies ‘t zelfde. Twee veur de pries van ein. Allein haet hae maot 54 en zie mäötje 40. Eerlik gezag: gein gezich. Mer… jeder ziene zin toch? En dat is toch allein mer de de boetekantj van die sjtèlle. Doe kèns se waal veur de kop kieke mer neit in de kop. Ich dènk waal hae de wanjel- of fitsroutes haet oetgezóch en de navigatie haet ingesjtèld;  zie de bótramme mit dreugwoosj gesjmeerd haet en de döbbelwandige IKEA thermoskan mit heite kaffe. Veural de kuikskes neit vergaete, want oetraste op ein benkske is  gouwekouper es op ein terras ! Mer erger vènj ich ’t es ein koppel ‘uni-look’ gedanke haet en die ouch nog ummer oetsjprik. Dan krigs te dèks de volgende ' conversatie’: “Nae, véér hawte neit van deze meziek, hè jóng” of “Veer vènje dat neit lekker” en  “Nae, dat is niks veur ós” of “Zoget doon veer noots” en   “Veer kieke dao neit haer, hè leive”, wobie de leive braaf jao knik of get ónversjtaonbaars mómpelt… ’t Liek esof me daodoor gein eige meining mee haet en dao ouch nog greutsj op is. Natuurlik is ’t fejn es me ’t dèks mitein èns is, mer ’t liek mich gezóndjer es me ouch meiningsversjille haet. En dao dan waal mit respèk mitein euver kalt…

Ich haop neit dat ich mit dit sjtökske luuj oppe (wanjel-of fits-)tene höb getrap, mer noe wit geer in jeder geval wie ich d’r euver dènk.  Noe zulle d’r waal luuj zeen die dènke dat ich sjeloes bèn op die ANWB-sjtèlkes, mer ich mót uch teleursjtèlle. Veer - mien vrouw en ich -  höbbe waal ’t zelfde mirk wanjelsjoon, mer gans versjillende kleur zökke, versjillende sjtekke, ich ‘ne rangerhoud, zie ein zónneklep, enz. en es ’t aeve kènt zuike veer ’n gezèllig terras op. Euveriges, ich bèn waal lid van de ANWB! 😉

Jedere geliekenis mit besjtaonde luuj of gebeurtenisse beröste gans op toeval en kómme gans oet de laevendige fantasie van de sjriever!

Pès de volgende van KUL pès KULTUUR. Mit de kómplimènte, © John

 

===========================================================================

Van KUL pès KULTUUR , ein sjtökske Zittesj van mich veur uch.

Jaorgank 7 nómmer   14                              16 augustus 2022

Vakans en filosofie.

Zo de zomervakans is bekans aafgeloupe. Höbt geer uch goud verammezeierd?  Veer zeen in eige landj en ouch nao ’t boetelandj gewaes en euveral waar ’t aeve heit. Dat de Eifel sjoon is wóste veer al lang, mer dat Nijmegen zo’n sjoon sjtad is nog neit. Bekans aeve sjoon es ós Zitterd!

Noe kènt geer uch gaon opmake veur ’t Sint Rosa Festival! 26 t/m 28 augustus. Dat belaof ouch weier sjoon te waere. Behawve  DJ Tony Viniellie, Rowwen Hèze en de Jansse Bagge Bend, traeje ouch ó.a. The Kik en Joris Linssen en zien Caramba op. Noe höb ich allein muzikante genuimp. Mer d’r kump nog mee e.n.m.e.n.v.m. 😉

Euver meziek gesjpraoke. Dao höb ich get sjpreuke van biejein gezeumerd: Arthur Schopenhauer, eine Dutsje filosoof, haet ’ns gezag: ‘architectuur is zoget wie bevraore meziek’.  Ich vènj dat ein poëtische oetsjpraok. Sjus wie ‘wo weurd te kort sjeite, sjprik de meziek’ van Hans Christian Andersen, dichter en sjpreukskessjriever. Gustav Mahler, dae van dae ‘zjwaore’ meziek  sjreef: ’t wichtigste in de meziek sjteit neit in de mezieknote’. Ziene collega Richard Wagner haw ’t euver: ‘Meziek vink dao aan, wo weurd sjtoppe’. Diane de Beausacq, ein Franse sjriefster zag : ‘Meziek deit ós vuile waat veer dènke’. Ós aller Ludwig van Beethoven verklaorde: ‘Jederein dae miene meziek begrip, zal nooitsj mee óngelökkig zeen’. Nog mee: Mstislav Rostropovitsj, Russisch muzikant, haet ’s gezag: ‘Meziek vink aan mit sjtilte’.  ‘Meziek is de ènsigste taal wo-in se neit get gemeins kèns zègke’  is gesjreve door John Erskine oet Amerika, hae waar sjriever en pianis. En de bekènde acteur en sjriever Peter Ustinov oet Engelandj vertèlde: ‘De lach is de meis vruntjtelike meziek oppe welt’.  De allersjoonste oetsjpraok vènj ich zelf: ’Meziek is de modertaal van ’t hart’ van Ernst Hohenemser oet Dutsjlandj.

’t Is ein gans anger sjtökske gewore es ich mich veurgenómme haw. Dao mót geer ’t ditskeer mer mit doon.  Ich höb vakans. Geneit van alle sjoons dat ’t Sint Rosa Festival uch geit brènge en veural van de meziek. En dènk dan nog ’s aan de sjpreuk van hiebaove!

Pès de 6e september. De kómplimènte van John.                          

Op- en aanmirkinge, reacties en/of vraoge: johnhertogh@gmail.com   

 

Van KUL pès KULTUUR, ‘n sjtökske Zittesj van mich veur uch.

Jaorgank 7 nómmer   13                                                    26 juli 2022

 

Bliedsjap en leid..

Hónderdviefendertig sjötterieje deige dit jaor mit aan ’t Awd Limburgs Sjöttefees in Meijel. Op de tweede zaoterdig sjtónge Sjötterie St.Martinus oet Bor en Sint Willibrordus oet Obbeeg taengenein in de finale.  St. Martinus Bor wón oetèntjelik. ‘ne Dikke perficiat veur alle twee die vereiniginge.  Op 2 juli 2023 maag St.Martinus ’t O.L.S. organiseiere. Behawve de ganse Sint Martinus-famieje waar ouch de burgemeister van Zitterd - Gelaen hartsjtikke blie, zo lous ich.

Mer Max Verstappen waar neit zo blie. Hae wón jus neit op de Red Bull Ring in Eusteriek. Zien doezende (Limburgse) fans ware ouch neit zo blie… Mer óm dan zo te reageiere?? Ich vónj ‘t Sjameswaerd.

De maedjes eh.. dames van ’t Oranje voetbalteam hawwe ouch  väöl  pech, in de eesjte wedsjtied mouste geblesseierde sjpeelsters oetvalle en corona zörgde veur nog mee leid. Op ’t momènt dat ich dit sjrief höbbe ze goud gewónne van Zwitser-landj. Ich blief veur ze doeme.

De muzikante van  hermenie St.Cecilia oet Beeg- Papenhaove zeen ouch gans blie: ze zeen op ’t Wereld Muziek Concours (WMC) in Kirkrao wereldkampioen gewore in hun klasse. Ouch veur hun eine ganse dikke perficiat!

Ich bèn blie mit zoväöl blie gezichter óm mich haer, want de zomervakans  is be-gónne en gans get maedjes en jónges höbbe kènne feeste ómdat ze gesjlaag zeen.

 

Ich wil aeve neit dènke aan sjlech nuuts, euver Oekraïne, Ruslandj, sjtiksjtof- en anger probleme, zo wie dae sjmerige corona. Ich blief positief, sjreef in 2019 dit gedichske:                                

zap ‘t nuuts noe aeve weg

de gezèt kump sjtraks waal oet

nae, ich sjloet mien ouge neit

sjtaek de kop neit in ’t zandj

dènk mer dèkser positief

zuug gein baere oppe waeg

blief geluive in de jeug

‘al kump goud’ is geine druim

es noe jederein veur zich

mit de anger’ raek’ning hiltj

en oug dèkser mitein kalt

zuut de welt gans angesj oet!

 

Mit de kómplimènte van John. Pès de 16e augustus. Fejne vakans.       

Op- en aanmirkinge, reacties en/of vraoge: johnhertogh@gmail.com    

=============================================================================

Van KUL pès KULTUUR, ‘n sjtökske Zittesj van mich veur uch.

Jaorgank 7 nómmer   12                                                    5 juli 2022

Veur ich begin: ich wil alle luuj die mich gefeliciteierd höbbe mit miene nuje bundel van Oukouk pès Cötelbaek bedanke. Natuurlik ouch degein die ’t buikske al gekóch höbbe. ’t Zou sjoon zeen es Wim Krings mich bènnekort zou belle dat ze oetverkoch zeen! 😉

Zomer in ’t landj?

Höb geer ouch zo genaote van ’t sjone waer van aafgeloupe daag? ’t Wurt langzaam zomer, dènk ich. ’t Woort ouch tied.  Ich höb mich waal ei bietsjke gesjteurd aan dae sjoeleradar. Woróm? De kleinkènjer hawwe sjportdaag, mer ómdat ’t volges dae sjoelradar sjlech waer zou waere, woort dat aafgelasj. En waat dènk geer? De gansen daag höb veer geinen dröppel raenge, laot sjtaon ein ganse sjoel gezeen! Me kènt baeter aan de boere op ’t landj vraoge waafer waer ’t wurt. Die höbbe meistes waal geliek…

In deze sjonen tied waere ouch väöl feeste gehawte: aafgesjtudeierde sjtudente, gesjlaagde sjoliere en vanwaege corona ingehaolde verjäördaag en anger feeste. Leifs boete natuurlik, mit ‘ne dampende (soms ouch sjtinkende) bbq, aope vuur-körf mit of zónger vóchtig hout en bónkende en/of gezèllige meziek pès in de kleine urkes. Dae bbq en meziek heure d’r mesjiens waal bie, mer woróm me mit 24 graad Celsius ‘ne vuurkörf leet brenne, begriep ich dan neit. Dat is toch neit erg milieuvruntjelik en daobie ouch nog ein plaog veur de luuj mit COPD of anger lóngklachte. En es me neit oppertied alle vinstere toe haet, sjtink ’t ganse hoes – en de wesj die boete te dreuge hink – nao rouk.

Dae sjone zomer dus. In mien herinnering doerde dae vruiger ummer langer en waar ’t ouch ummer väöl wermer. Ich zeen ós op z’ónne wermen daag nog fitse nao de Bagger (noe Hommelheide) in Zöstere of puffentaere nao de Heelderpeel bie Heel. Oppe fits of de Berini, tesj mit zjwömbóks, geine bikini, Heelderpeel is bekans boetelandj, de ganse femieje op ’t zandj… (oet ein awd gedich van mich). Veer hawwe vruiger geine wage; pap haw waal eine brómfits. Veer veier kènjer en de mam hawwe fitse!

Mer.. mit goud waer gónge veer mit de laeren tram (te vout) nao de Kolleberg, ‘n  gevölde manj mit bótramme en limmenaad en ‘ne bal d’r bie. Nao de zandjkoel of de kogelvanger, dao wo noe de krómbreudjes waere oetgesjmete. Ouch gónge veer dèkser nao de Lömmericherbósj. Of nao de sjpaortunnel richting de Nuusjtadt, op ’t graasveldj nao treine en auto’s kieke! Ich dènk d’r nog dèks aan es ich dao noe langs rie. Zo krege veer doe de zónnige zóndigmiddige goud óm…Gans get angesj es de Tour de France, Wimbledon, Max Verstappen en ’t Awd Limburgs Sjöttefees..

 

Mit de kómplimènte van John.

Pès de 26e juli. Op- en aanmirkinge, reacties en/of vraoge: johnhertogh@gmail.com    

PS: Mörge in de VIA: miene rubriek Ós Modesjtaal!! 

==============================================================================

Van KUL pès KULTUUR, ‘n sjtökske Zittesj van mich veur uch.

Jaorgank 7 nómmer   11                                                    14 juni 2022

 

Awee, haw ich mich toch bekans vergaete ein nuuj sjtökske Zittesj veur uch te sjrieve en te versjikke! Want nao ein gans óntsjpanne waek wanjele in de Eifel, wo mer ein sjoel raenge euverdaag is gevalle, bèn ich d’r neit toe gekómme. Mea culpa. ’t Voul mich bietieds in dat ich veur 10 jaor ouch ein verhäölke höb gesjreve euver ós jaorlikse Eifelvakans. Hie kump ’t nog èns:

 

De Rureifel

“’n Vief kerteier vare mit de wage en veer zeen weier dao: in ós “tweede hoes” in de Eifel. ‘n Gezèllige en kleine Stjube, veur ós de plaatsj óm op rös te kómme.

 

De wirt ontvink ós wie ummer gans hertelik en werm en haet ós kamer al vaerdig gemaak, wie ummer, nómmer zeve, ónger ’t daak. Gein oetzich, mer waal gans, gans röstig. D’n tillevies oppe kamer wurt dees waek neit aangeraak. En es ’t sjlech waer wurt höbbe veer genóg buik en tiedsjtrifte bie ós. Mer ouch die waere neit dèks gebroek.

 

Ós wanjelvrunj zeen ouch al dao: veier wanjelaesj die sjus wie ós väöl plezeier belaeve aan loupe de natuur en sjus wie ós geneite van gezèlligheid en van goud aete en drènke.

 

Jederen daag loupe veer z’ón vief oer door boesj en veldjer en langs ’t water. De haop óm wildj te zeen gaeve veer al sjnel op.  Allein es veer al ‘n paar oer höbbe geloupe en jederein muig begint te waere en ouch neit mee zoväöl vertèld wurt, is d’r ‘n klein kans om reeje, wilj verke of herte te zeen.

 

Es veer dan thoes kómme bie de Sjtube, drènke veer ós get en nao de werm doesj maake veer ós vaerdig veur d’n aovend: ’n geweldig diner (meistens mit wiljd), ei lekker glaeske wien óf Kölsj of frisj en daonao wurt d’n daag ‘geëvalueierd’.

 

Nao z’ónnen daag ligke veer meistes bietieds in bèd. Sjmörges zitte veer om hawf neuge aan de taofel, sómmige mit klein uigkes, mer nao de sjtrange kaffe geit ouch dat euver…”.

 

Noe ich dit nog ‘s laes, wunsj ich dat veer nog lang nao dees besjtómming kènne kómme, es God bleif. Hie is gelökkig wenig verangerd. Jao, toch waal, die vief oer wanjele per daag zeen intösje drie oer gewore…! 😉

 

Mit de kómplimènte van John. Pès de 5e juli.      reacties: johnhertogh@gmail.com 

==============================================================================

Van KUL pès KULTUUR, ‘n sjtökske Zittesj van mich veur uch.

Jaorgank 7 nómmer   10                                                    24 mei 2022

 

Alles kump trök.

Aeve wènne, de draod weier opnumme nao drie waeke gein sjtökskes sjrieve. Terwiel d’r zoväöl passeierd is óm euver te sjrieve. ’t Jaorlikse fitsverkeersexame veur de kènjer van de legere... ehh basissjool beveurbeeld. Ómdat ’t jóngste kleinkèndj mit deig en ómdat ze door ós sjtraot fitse, höbbe veer dat natuurlik gevolg.  Sjoon wie ze allenej hun handj oetsjtaoke en euver de sjouwesj keke veurdat ze de boch ómgónge. Wie lang zouwe ze dat zo volhawte?

’t Meist belangrieke is natuurlik dat ós Fortuna in de eredivisie blif! Wat waar dat sjpannend, neit dan? Ómdat ’t z’on sjoon waer waar, zoute de meiste naoberluuj boete en wie de wedsjtried waar aafgeloupe heurde me van alle kènj gejoech en leipe de luuj, veural kènjer, van gekkigheid de sjtraot op óm ‘ns flink te laote heure dat ze blie ware. Nao veure Fortuna! Die anger ploug, oet Kirkrao, is ‘t neit gelök trök in de hoogste voetbalklasse te kómme. Weier gein sjpannende Limburgse voetbalderby’s dus ‘ t kómmend jaor. Of veer dao ech blie mit mótte zeen?

Waat waal trök van weggewaes is, zeen die Japanse doezendknuip die me aafgeloupe tied langs en in de buurt van de Cötelbaek koosj vènje. Waat ein elenj toch. En waat ein geldj dat dat al gekos haet. De gemeinte dènk noe dat ze ein oplossing höbbe gevónje óm die prengele gans oet te roeje. Mer of dat lök? Ich doem veur ze. Eesj mer ‘ns oprume waat door ’t noodwaer is versjangeleierd!

Óm te vergelieke: Ich mót jeder jaor gans väöl muite doon óm ’t zeveblaad (onkroed) oet mit häöfke te kriege. Lök mich nog ummer neit gans. Die blieve ouch trök kómme. Sjus wie de sjlekke, trouwes. ’t Zal waal aan mich ligke, want gruin vingesj höb ich nog nooitsj gehad.

Waat ouch trök is gekómme is ’t ónwaer of wie me vruiger zag ‘t dónderwaer, de hagel en raenge aafgeloupe waek. ’t Veil veur de meiste luuj van Zitterd en óm-sjtreke waal mit waat betruf de euverlas en sja, gluif ich. Ofsjoon, doe zouws mer z’one pech höbbe...

Zo zeen d’r eine ganse houp zake die jeder jaor trökkómme; dao kènne veer wenig aan verangere. Of waal? Ich höb al ei paar waeke ’t graas neit gemejd, ’t sjient dat de bieje en anger insekte dan vlotter trökkómme! En ...’t haet mich ein urke weniger böttele in d’n haof gebrach!  

Lètste nuuts: Op 3 juni aansjtaond wurt miene nuje bundel door de Veldeke-krènk gepresenteierd en daags d’r op lik ’r bie Wim Krings in ’t boukgesjef. Vraog mer nao: Van Oukouk pès Cötelbaek van John Hertogh.                                                                            

En nae.. ’t geit neit euver de revuu! Ich höb de bouktitel in 2020 al bedach ;)

Op 14 juni versjient nómmer 11 van ‘Van KUL pès KULTUUR’. Pès dan.

 

Mit de kómplimènte van John.                                                                                     

reacties: johnhertogh@gmail.com 

==============================================================================

Van KUL pès KULTUUR, ‘n sjtökske Zittesj van mich veur uch.

Jaorgank 7 nómmer   9                                                      3 mei 2022

Euver drök en drökte.

 

Vandaag ein kort sjtökske Zittesj. Ómdat ich ein waek in ’t boetelandj höb gezaete haw ich geinen tied óm te sjrieve! En ich höb geine veurraod van sjtökskes!

 

’t Waar weier drök op Keuninginne...eh Keunigsdaag, höb ich mich laote vertèlle. Bèn d’r zelf neit biegewaes, want veer zeen aeve mit z’n tweeje d’r tösjenoet gewaes nao óze geleifde Eifel. Óm de drökte zogezag te óntloupe en óm óntsjpanne, nuuj routes te óntdèkke en te loupe. Natuurlik ouch óm te geneite van ’t geweldige aete en drènke in ós vertroewde landjhotel/restaurant! Dao waar ’t dits keer al get drökker waeges ’t sjone waer. Ich vroug mich aaf: Besjteit ’t woord óndrökte ouch?

 

Wo de luuj zich allewiele drök euver make: ein fits-/voutpaad dat op drie maeter aafsjtandj van de al jaore besjtaonde sjtóp wurt aangelag! Naeve dae sjtóp lik al jaore ein fitspaad. Dae sjtóp, wo hónderde kènjer van de legere sjool en hun en awwesj en de meisters (jao, ouch ich) en juffrouwe al decennia lang daagliks gebroek van make en maakde. De sjtóp wovan de tegels noe waal get sjeif ligke, mer dao houf toch zeker gein gans nuuj paad te waere aangelag!  

Mer wach aeve... hawvwerwaege  ’t nuuj aan te lègke paad sjteit ‘ne boum in de waeg. Waat noe? Mót me dao noe ein kapvergunning veur aanvraoge? Dènk aan ós milieu. Of krig ’t paad eine krunkel? Waat geit dat allenej neit koste?

De aanlèk is intösje sjtil gelag. En ein gebroekde teikening van twelf jaor geleje krig de sjoud! Dao sjteit dae boum verkeerd op aangegaeve! Dao zeen ze waal get laat achter gekómme, vènj ich. Goud laeze is ouch ein kuns.

Gelökkig houf ich mich euver die dènger neit mee drök te make. In 2016 sjreef ich ein gedichske euver drök make:

Reig dich neit zo op, maak dich neit zo drök, 

dat is ’t toch neit waerd, zie kump vanzelf trök;              

laot mer effe röste, mesjiens deit dat waal goud,

en es se weier dao is, höbs doe ’t neit mee kawd !

 

Ómdat ich weier mee ómgang bèn mit gedichter es mit verhaole, versjiene mien sjtökskes veurleupig óm de drie waeke. Op 24 mei versjient nómmer 10.

 

Mit de kómplimènte, John                                         reacties: johnhertogh@gmail.com 

===========================================================================

Van KUL pès KULTUUR, ‘n sjtökske Zittesj van mich veur uch.

Jaorgank 7 nómmer   8                                                      19 april 2022

Tradities

 

Op paosjzaoterdig waar ’t weier zo wied: de KMS, de  Kennedymars Sittard.

Vief keer höb ich ‘m geloupe. Veier keer gans en bènne de tied. Daen eine keer dat ich oetsjtapde in Thoear, koum ómdat ich teen kilomaeter mit eine gróp soldaote haw mitgeloupe. In hun tempo, dat dudelik te hoog waar veur mich! Ouch hunne soldaotepas waar sjus te groot veur mich. Gevolg: ein sjpierverrèkking die verrèkde pien deig. Ich kal (sjrief) waal euver de jaore zevetig en tachtig van de veurige eeuw! In daen tied hawwe veer nog geine gsm en woorte neit zo gevolg en begeleid wie op vandaag d’n daag. Veer haopde ummer daste femieje of kèn-nisse langs de kantj zougs sjtaon, die dich nuje frisje moud gouve zo daste weier wiejer góngs...

De route van de Kennedymars is in de loup van de jaore get verangerd, mer ’t is nog ummer aeve lank en aeve lestig. Wie ich de eesjte keer mitleip, in de zeve-tiger jaore, gónge veer mit eine ganse tróp laeftiedsgenote, zónger väöl veurbe-reiding en leipe nog via Tudder, Heinsberg, Wassenberg nao Herkenbosch en wiejer.

Mien volgende twee tochte, in 1987 en 1988, höb ich same mit mien vrouw oetge-loupe. De veierde en lètste maol leip ich in 1989. Daonao waar ’t de beurt aan ós twee zone, die ‘m ouch gans get kere - mer dan väöl flotter - geloupe höbbe.

En nog ummer es ich gaon kieke, kriebelt ’t mich. Mer mit twee nuuj häöpe en es 70-plusser zal nog èns mitdoon neit zo mekkelik zeen! ’t Blif ein sjoon traditie, die volgend jaor al z’ón zöstig jaor besjteit.

Dit jaor hawwe ze wieier èns gelök mit ’t waer. De luipesj, verzörgesj, mer ouch de toesjouwesj. Ich zoug dat ‘r gelökkig weier väöl jeug mitldeig en neit allein bie de 10km en 40 km tochte!  En sjoon, al die kapelkes en zate hermeniekes en anger muzikante die veur ein sjoon ambiance zörgde.

Oppe Mert in Zitterd hóng ouch ein geweldige sfeer: ein saort réuniegevuil, mit óntsjpanning en gezèlligheid. Wie de luuj ouch nog hoorte dat Fortuna van Sparta gewónne haw, woort ’t nog gezèlliger!

Al mit al eine manjefieke Paosjzóndig. En eine opsjtaeker veur de horeca, gelök-kig. Eine dikke proficiat veur jederein dae mitgeloupe haet en dae mitgehólpe haet óm dees sjoon traditie te behawte veur ós sjtad en sjtreek.

Ouch de festiviteite van Paosjmaondig louge d’r neit óm. Dat belaof get veur de kómmende zomer. Ich dènk dat veer dao allenej aan toe zeen in deze lestige tied.

 

Pès nómmer 9,  euver veerteen daag,

Mit de kómplimènte, John                                         reacties: johnhertogh@gmail.com 

==========================================================================

Van KUL pès KULTUUR , ‘n sjtökske Zittesj van mich veur uch.

Jaorgank 7 nómmer 7                                                5 april 2022

 

’t Is weier zo wied, sjuve mit d’n tied.

 

Waat geit d’n tied flot. Zeker noe de klok weier verzat is. Dao wèn ich nooitsj aan, dat ganse gesjörg mit al die klokke! En meistes vergaet ich d’r ein sjtèl en kóm d’r ein paar waeke later pas achter. ’t Klökske van de centrale verwerming, d’n aove en dae in miene wage, beveurbeeld.

“Der Lenz kommt mit vielen bunten Blüten daher”, lous ich in de  Dürener Illustrierte. Sjoon gesjreve, neit? Vrie vertaald: ’t Vruigjaor kump d’r aan mit ziene bóntje bluij. Bie ’t awd zjwömbad aan de Vieverwaeg in’t park van Zitterd kump dae bluij ouch lankzaam op gank. ’t Is jeder jaor ein kómme en gaon van luuj die foto’s make van de raoze bluij van de Japanse seier-keesjeboum en van kemunekantjes, eindexamekandidate of broedspare in hun feeskleier. Die buim waere euveriges op ’t Belsj  Japanse kerselaar genuimp en  kómme van nature veur in West-China, Korea en Japan.

Hae zuut d‘r gans angesj oet es dae angere  Japanner, de doezendknoup, dae ouch in ‘t zelfde park gans hel gruit. En wo me mit man en mach ómgang is om ze te besjtrieje. Die plant is famieje van de rabarber. En me zaet dat ‘r aetbaar is, hartsjtikke gezóndj en dat ‘r zelfs genaezend kènt wirke! Ich lous in de gezèt dat ze in Amsterdam ouch väöl las van dae doezendknoup höbbe. Dao per-beiere ze ‘m zelfs te laote verdrènke! ’t Water trèk de zuursjtof dan oet de gróndj en dat zou d’r veur zörge dat de doezendknoup geit aafsjterve. Waal vraemp dat hae in Zitterd langs de Cötelbaek, die vol mit water sjteit, gruit!

 

Intösje is ’t alweier april. Dae deit jao waat ‘r wil. Sjus wie dae driedöbbel-gesjteurde Poet in Rusland. De eesjte lentesjnee is ouch al gevalle, mer dat heurt eigelik neit bie ‘t vruigjaor. Ich wach daoróm mer aeve aaf óm nuuj gruingoud in mien häöfke te gaon plante! Want de sjneeklökskes en de wèntjerviejeulkes zeen al wied oetgebluid!

 

Ich wil dits keer eindige mit ein gans positief berich: Waat höb veer aafgeloupe zaoterdig genaote van ’t pregram Zitterd Sjittert, georganiseierd door de Laammaekesj in de Vief Heringe. Prechtige optraejes van Cyrille, Esther, Fieny, Jan, Paul en Paul-Jean mit aw leidjes van ónger angere de Vief Naze, Teun Hermans, Frits Rademacher, Mark Courage (Baroesjko), Bjorn en Mieke e.n.m.e.n.m.e.n.v.m. Dit alles begeleid door ’n fejn klein LOOSE combo en geprezenteierd door Nicole Schurgers. Is ein nuuj traditie gebaore??

 

Pès nómmer 8,  mit de kómplimènte,                    reacties: johnhertogh@gmail.com 

=============================================================================

Van KUL pès KULTUUR , ‘n sjtökske Zittesj van mich veur uch.

Jaorgank 7 nómmer 6                                                22 meert 2022

Van sjtömme pès Sint Joep.

 

Zo, höb geer ouch eur ‘burgerplich’ gedaon en gaon sjtömme? Veer waal.  Ich lous dezen oetsjpraok van ein Limburgse sjriefster op ’t inter-net: “Este neit geis sjtömme maag se niks zègke, es te waal geis sjtömme ouch neit!” Mous ich aeve euver naodènke...

Veer höbbe dit jaor, sjus wie jederein, num ich aan, gans väöl foldesj van versjillende pertieje en kandidaatsraodslede in de breivebös gekrege. En zelfs de sjtömwiezer ein paar maol ingevöld. Mer ómdat väöl pertieje ‘neutraal’ hawwe ingevöld es antjwoord, haw ich dao wenig aan.

Toch höb ich mich waal ein paar daag gans populair gevuild: van alle kènj kreeg ich van väöl (vraem) luuj de gouwendaag es ich euver de sjtraot of de mert leip! En ich höb gaar niks mit polletik! Deig mich dènke aan mien jeug: Wie ich ’n jaor of zösteen waar en nog gaaroets neit moch sjtömme, woorte mien vrunj en ich ouch op sjtraot aan-gesjpraoke  mit de weurd: Dènk geer ouch aan mich bie ’t sjtömme? En daobie krege veer ein losse sigrèt in de henj geduud, terwiel veer in daen tied neit èns roukde...

Waat höbbe veer gelök gehad mit ’t waer op Sint Joep dit jaor, neit dan? Ich höb dan ouch gans get tied gesjarreld en gesjraveld tösje de kräömp-kes. Vanzelf koume ouch noe weier herinneringe aan vruiger tieje. Van wie ich mit miene pap sjaermetskes, sjoonszaole, naegelkes, sjnelbèn-jesj, solutie (-liem) van Simson en bènnebenj veur ein gans jaor góng koupe op de mert. En meistes noume veer ouch ein sjoon grote plant mit veur de mam. Ich vraog mich nog aaf wie veer die oppe fits thoes krege! Veer kènjer krege natuurlik  de neudige sjlók: sjoon touver- en wienböl, zuithout of zoersjtekke, zjwart-op-wit in ein pepiere tuutje. Van die helle sjoemblök of zachte sjpekskes. Veer keke en loesterde mit aope móndj nao de verkuipesj, die meistes mit väöl humor en nog mee fantasie hun waar aan de man en de vrouw perbeierde te kriege.

Ich vónj ‘t sjoon óm te zeen dat väöl luuj weier mitein koosjte kalle in de café, op ’n terras of tösje de kräömkes...                                         

Pès nómmer zeve euver 14 daag,  mit de kómplimènte,  ©johnhertogh 

 

============================================================================= 

Van KUL pès KULTUUR , ‘n sjtökske Zittesj van mich veur uch.

Jaorgank 7 nómmer 5                                                          8 meert 2022

 

Trök- en veuroet kieke.

‘t Waar eine prachtige optoch aafgeloupe Vastelaoveszóndig in Zitterd. En daobie ouch nog z’ón goud waer. Ómdat ‘r korter waar es in vruiger jaore, höb ich ‘m zelfs twee maol kènne bekieke. De wages kènde ich al natuurlik ómdat ich ze al in de hal haw gezeen, mer boete in ‘t zunke koume ze nog baeter oet de roodgaelgruine verf. Chapeau veur de wageboewesj, deilnummesj en de organisatie. En  ‘t publiek natuurlik. Waat ein luuj, waat ein sfeer. Sjoon dat ózze awd-prins Thierry toch nog op ‘ziene’ wage d’n optoch aafsjloot. Ich dach aeve dat ‘t eine Belsj waor, vanwaege de bebbelskes en anger sjlók !  :-)Euveriges, ich höb ózze nuje eesjte burger, grootvors van de Flaarisse oet Zitterdzuid én sjermheer euver ‘t Sjterrebosj en euver de Zittesje tradities, waeges de drökte neit perseunlik bie d’n optoch gezeen, mer waal later op d’n daag op zien Feesbouk..! Dao lous ich ouch dat awd-burgemeister Sjraar Cox woort óngersjeije mit de hoesorde van de Flaarisse!? Alaaf, gaef mich mer ózze Zittesje grootvors Frits!Veurdat ich ‘t vergaet: eine ganse grote pluum veur radio Nónnevot mit de al-lersjoonste vastelaovesmeziek oet Zitterd en allein ‘t allerbèste oet Limburg. Dat waar richtig geneite, veural veur de luuj die neit nao boete koosjte mit die daag. Sjus wie de livestreams van ‘t Kanón en d’n Optoch. Names väöl loesteraers en kiekesj zèk ich: danke allenej. Dat moosj ich nog aeve kwied.Pès zo wied euver de Vastelaovend 2022.  Vandaag, 8 meert 2022, is ‘t weier internationale vrouwe-daag. Eine sjpeci-alen daag, al mee es hónderd jaor. Veur mich perseunlik ouch, alweier veur de 73e  maol! Mer eigelik is ‘t geinen tied óm get te viere. Laot’ veer haope dat daen oorlog in de Oekraïne gaw aafgeloupe is en de vrei flot kump.

 

sjtil nao de sjtórm

 

es mien pen laeg is... en de ink sjus dreug... waere weurd deizig* ... want traone völle mien ouge... valle op ’t laege blaad... vórme ‘ne sjtroum... vol vale vraogteikes... mien gedich vilt sjtil... es de bómme valle... vilt alles sjtil...

 

 (*deizig=wazig)                                                      

==============================================================================

Van KUL pès KULTUUR , ‘n sjtökske Zittesj van mich veur uch.

Jaorgank 7 nómmer 4                                                         22-2-2022

 

Nóndepie!

Haw ich mich wie väöl anger luuj gesjpich op ’t Kanón van ’t Balkón (en wie väöl jeug op de Sjoliere-vastelaovend) oppe Mert in Zitterd, wurt ’t mich op ’t lètste momènt aafgeblaoze. Van de eine kantj begriepelik, mer ’t pitsj toch. Gelökkig höbbe veer al get vastelaovend kènne viere mit ’t Limburgs Vas-telaovesleidjes Konkoer in Venraoj. En ouch oppe Plök en Vaere-zitting van de Marotte in ’t Forum, gesjtriemp of laif. Dao woort weier richtig awwerwèts geslach en gesjamp.  Vastelaovend is ouch geneite van de nuje Pappegey en van de Sjwarte Sjteek van ’t Convent van Neit Prinse. Die lètste klup haet aafgeloupe zóndig weier de sjone alternatieve Kènjer-optoch geloupe in de sjtruimende raenge.  En ze brènge ós ouch nog dees waek de nach van ’t Awd Wief! En waat betruf ’t LVK: van mich kriege de Zittesje deilnummesj allenej de pries veur ’t meis Zittesj elemènt!

Mer ich bèn waal benuud waat ze versjtaon ónger eine Grote Optoch, waal kleiner van ómvank en ópzèt? Veer zulle ’t zeen. ’t Motto belaof waal get: “Laot de Vastelaovend neit verrekke, doog allenej mit en laot d’n optoch trèkke!” Ein dènk is zeker: de luuj kómme toch nao de sjtad, optochte of neit. En dènk geer wurkelik dat de jeug geine vastelaovend geit viere? Dat luif geer zelf neit.

‘t Is waal ein gelök dat veer de sjtórm Eunice al gehad höbbe, angesj zou d’r gaaroets geinen optoch zeen gewaes, sjus wie ’n paar jaor trök! Ich haw mien nuuj Laammaekesjvaan sjus veur de sjtórm oetgesjtaoke, mer gelökkig oppertied bènne gehaold. ’t Zou zunj zeen es mich dao get aan zou kómme! Es geer dit laes, hink ze weier sjoon baove de nuje posters van de gezèt en de Marotte te flappere. En volges de sjoeleradar wurt ’t zóndig sjoon waer.

     Ich haw ouch es titel sapperlout kènne gebroeke! ‘ne Awwe vlouk of oet-roup. ‘t Klink neit zo nöt wie de weurd die me op vandaag d’n daag in dees situaties gebroek...  Wie ‘t ouch löp, ich wunsj uch allenej ‘ne sjone, fiene en zelige Vastelaovend

=============================================================================

Van KUL pès KULTUUR , ‘n sjtökske Zittesj van mich veur uch.

Jaorgank 7 nómmer 3                             8-2-2022

 

De lètste nachtegaal.

Dao mous ich aan dènke wie ich in de gezèt lous en op ’t nuuts zoug en heurde euver ’t Sjterrebos bie Bor. Waat ein gedouns. De óngertitel van dit humoristische buikske van Leo Herberghs De lètste nachtegaal is: verwikkelinge in ein Limburgs dörp. ’t Is ein buikske oet 1977, viefenveertig jaor awd dus. ’t Is waal in ’t Holles gesjreve. En ’t  sjtóng lang in miene boukekas, aafdeiling Limburgensia, ofsjoon ’t neit in ’t Limburgs is gejsjreve. Peter Bertus oet Mesjtreich (pseud. Petrus) haet de sjoon  teikeninge in dit kènjerbouk gemaak. ’t Verhaol liek op ’t Sjterrebosverhaol en haet eine gelökkige aafloup. Ich haop mer dat dat veur ’t Sjterrebos ouch zo aaflöp. (Laes sjus dat dat neit zo is (JH))

Leo Herberghs - in 2010 benuimp tot Limburger van Verdeinste - maakde naam mit ein imposant aantal dichbundels, kènjerbuik en prozawerke. Hae waar vruiger ouch journalis bie De Limburger  en woort de wanjelende dichter genuimp. Hae haw ein veurleifde veur de natuur en ’t landjsjap. Ónger zien wanjelinge deig hae insjpiratie op. Dat haet mich es wanjelaer  ummer aange-sjpraoke. Pès zo wied de KULTUUR!

Wie ich weier aan dit óngerwerp kóm? De lètste waek höbbe veer al gans get foldesj in de bös gekrege van luuj die de kómmende jaore in de gemeinteraod wille kómme. Die verkeizinge zeen pas in meert, dus tied genóg óm te keize. Mer ’t wurt lestig: Derteen partieje doon mit aan de gemeinteraodsverkeizinge 2022. Die partieje höbbe in totaal 326 kandidate opgegaeve veur de 37 raodszaetele. D’r zulle nog waal get foldesj in de bös volge...

Gistere höb ich weier ein sjoon wanjeling gemaak door ós bekans vaerdige sjtadspark. Dat wurt ech sjoon! ’t Geef natuurlik luuj die vènje  dat teväöl mac-adam of sjtein is gebroek en dat ‘r te wenig gruin is, mer ich höb begrepe dat ‘r 500 nuuj buim geplantj waere. En es ’t vruigjaor kump, wurt ’t vanzelf gruiner, dènk ich. Ich höb in jeder geval genaote van de wanjelaesj, de rolsjaatsesj, van de awwesj en oma’s en opa’s mit of zónger wanjelwages, van verleifde sjtèlkes. ’t Veil ouch op dat ‘r väöl fotoos woorte gemaak. Dao waar ’t ouch ’t waer veur. Ich mous waal aaf en toe opzie sjprènge veur get langsflitsende fitserennesj!

 

============================================================================

Van KUL pès KULTUUR , ‘n sjtökske Zittesj van mich veur uch.

Jaorgank 7 nómmer 2                             25 -1-2022

Vrieheid pruive.

Dat waar ’t op zaoterdig 15 januari jl. Aeve vrieheid in deze kl.t. coronatied. Veer höbbe d’r van genaote. ’t Vóng al vruig aan: es eesjte nao de oetgesjtèlde Krismes-veursjtèlling van Kwebbel en Sjnebbel in ’t Forum.  De sjlummefoon mit QR code in d’n aansjlaag. Veer zoute sjoon veuraan gans ruum óm alles goud te kènne zeen en heure.  Weier awwerwèts traone gelache. Danke ‘maedjes’ ! Ouch dank aan ’t gedoogbeleid van ózze burgemeister trouwes. Daonao zeen veer ós oppe Mert bie Schtad Zitterd get gaon aete en drènke. Alles waar aeve sjoon en gezèllig: nao bènne mit daezelfde sjlummefoon, twee fejn ruum zitplaatsje, lekkere sop, bitterbelkes, pilskes enz. Allein mer luuj gezeen mit eine grote lach op ’t gezich.  Waat höbbe veer dat gemis! Ouch boete oppe Mert waar ’t gezèllig drök. Veer hawwe ein gans veilig gevuil. (ouch ómdat veer al lang ‘geboosterd’ zeen). ’s Aoves zeen veer nog ’s trökgewanjeld nao de sjtad. Nao de Griek oppe Pötsjtraot. Op aafsjpraok en mit code woorte veer gans hartelik óntvange. ’n Eige ruum taofel en weier allein mer vruntjelikke, blie en gezèllige luuj op ‘n ‘veilige’ aafsjtandj óm ós haer. Wie veer óm ach oer heivesj wanjelde leek ’t ei bietsjke kirmes of vastelaovend. Euveral gezèlligheid. ’t Zoug oet esof ’t vee nao de wèntjer oppe wei woort oetgelaote! Jao, oetgelaote is ’t richtige woord. Feestelik, geani-meierd, laevendig. Gein gedouns of zo. Sjoon óm te zeen en mit te make. Jaomer dat ’t mer zo kort doerde. Laote veer haope dat vanaaf mörge de teugele ummer losser gelaote waere. Ich doem d’r veur.

Wiejer mit dit sjtökske KUL-KULTUUR: Ich lous dat väöl awd leerlinge van ’t Kleesj oet nuusjier al in hun aw sjool geslaope höbbe, es gas van ’t nuje hotel. Bie mien aw sjool kènt dat jaomer genóg neit, mer doe kèns ’t geboew waal nog bezuike. Ich höb dat ’s gedaon wie ein van de kleindochtesj dao ein  optraeje mit Swentibold haw : ‘t Poppodium Volt oppe Odasingel. Daoveur heisjde ’t jóngerecentrum Feniks . Haopelik geit dat Poppodium noe ouch weier flot aope! Vruiger waar ’t in gebroek es sjool: bewaarsjool, legere sjool, mulo en kweeksjool veur óngerwiezesj en óngerwiezeresse. Wós geer dat ’t geboew ein  gemeintelik monumènt is, sjus wie ’t hoes d’r naeve, de óngerwiezersweuning. Allebei zeen ze in 1924 óntwórpe door de bekènde architek  Wielders.      

==============================================================================

Van KUL pès KULTUUR , ein sjtökske Zittesj door John HertogH

Jaorgank 7 nómmer 1                                                      11 -01- 2022

Verrasje.

Zelig Nuujjaor! Höb geer jederein al kènne verrasje? Of wit geer neit mee waat dat is? Vruiger sjprónge de kènjer ónverwach te veursjien óm famieje, vrunj of kènnisse ’t eesj ein zelig nuujjaor te wunsje. De gein dae verrasj woort mous ‘aafbetale’, trakteiere dus. Ouch de ‘grote luuj’ deige dèks mit.

De krisboum, de verlichting en ’t sjtelke zeen sjus veur Driekeuninge opgeruump. En gouw veurnummesj ? Ich höb nog ‘ne ganse lies van veurig jaor ligke. Baovenaan sjteit: ‘ne nuje bundel mit gedichter make en oetgaeve. De kaf mit titel zeen al vaerdig, de inhawd nog neit gans en sjponsore mót ich nog zuike...

D’n haof is ouch al vaerdig veur ’t vruigjaor. Noe nog ’t waer nog. Waat höbbe veer toch vraemp waer gehad de aafgeloupe maondj. De waersjpreuke kloppe neit mee gans, dènk ich. Ich höb d’r ein sjtèl opgezóch: Nuujjaorsnach sjoon en klaor beteikent ein vruchbaar jaor. Noe höb ich die nach nao boete gekeke, mer ich zoug ech gein sjoon en klaor lóch! ’t Sjtónk nao vuurwerk en ’t waar dómpetig. Waal höb ich intösje de eesjte mögke gevónje en de troewe laezer wit dat ich dao allergies veur bèn! Zie mótte mich neit, ich hun ouch neit! Es in jannewarie de mögke zjwerme, kèns te in meert de ore werme. Dat belaof nog get.

Eigelik zouw de Marotteprins al zeen oetgeroupe, jaomer, jaomer.  Aafgeloupe zóndig zouw dan Aope Hoes bie de prins zeen gewaes, mer ouch dat is versjaove. En es de corona-maotregele waere verlengk of nog sjtrenger waere, zulle De Marotte Zitterd geine nuje prins oetroupe veur ‘t sezoen 2021-2022. Gein sjoon veuroetzichte, mer haop deit laeve. Ich sjloet aaf mit dees wies weurd van Felix Rutten: “en mörge is dan alles op nuuts wie ’t vruiger ummer waar: vandaag d’n haof vol blui en fruit en mörge valle de blaar.”  ‘t Is jao van KUL pès KULTUUR!

 

'