Óm de 2 of 3 waeke sjteit ein sjtökske in 't Zittesj van mich veur uch mit d'n titel: van KUL pès KULTUUR op dees site mer ouch op mien Feesbouk en op de mail van luuj die 't sjtökske op hun eige mail wille kriege.
===============================================================================
Van KUL pès KULTUUR, ein sjtökske Zittesj van mich veur uch.
Jaorgank 9 nr.8 16-4-2024
Bènnekort is ‘t weier meivakans. Es sjoolmeister kreeg ich ummer te heure: “Waat höb geer ’t toch goud, zoväöl daag vrie in ’t jaor!” Dat is ouch zo, tèl mer mit:
Ein jaor haet 365 daag wo-op gewirk kènt waere. D’r zeen 52 waeke wovan al twee daag vrie (weekend), dan blieve d’r nog 261 daag euver. Per daag wirks te 16 oer neit, dat zeen 170 daag, dan blieve d’r 91 daag euver. Jederen daag drènks te ein hawf oer kaffe of thee, per jaor zeen dat 23 daag. Euver: 68 daag. Ein oer tösje de middig pous zeen 46 daag. Zo blieve d’r nog 22 daag euver óm te wirke. Normaal bèste twee daag per jaor krank, zodat nog 20 daag euverblieve. Daobie kómme de vief verplichte feesdaag in ein jaor, blieve euver: 15 daag. Este twee waeke vakans höbs, blif nog einen daag euver óm te wirke!!!!
Degein dae dit haet bedach, haet zeker neit bie mich in de klas gezaete, want hae kènt neit raekene! 😉
Mer zónger flawweKUL: de ‘secundaire arbeidsvoorwaarde’ veur ’t ónger-wies zeen neit sjlech, vènj ich. Mer ze mótte dan ouch hel wirke en neit allein in de klas. Ein veurbeeld: wie ich in 1970 ’t eesjte jaor veur de klas sjtóng hawwe veer èns in de paar waeke ein vergadering. Veertig jaor later - vlak veur mien pensioneiering - ware dat dèkser twee vergaderinge en euver-lèkmomènte per waek! En de neudige sjtudiedaag! Toch vènj ich ‘t jaomer dat ‘r zo wenig jónges en maedjes meister of juf wille waere.
Bènnekort höbbe de sjole dus weier meivakans. Dat verdeine neit allein de kènjer mer ouch alle luuj die hun begeleide. En dat zeen neit allein de meistesj en juffe! Ich haop dat ze allenej sjoon waer höbbe (dan höb ich dat ouch) en goud kènne oetraste.
Waat de KULTUUR betruf:Ich sjpich mich alweier op Zitterd Sjittert van kómmende zaoterdigaovend in de Vief Heringe. ’t Belaof weier sjoon te waere. En ouch op Keuningsdaag, de gedecoreierde, ‘t Parkfestival tösje 10 en 18 oer: mit regionaal talent, groot en klein. Van pril poptalent pès eine richtige rockband. Dat wurt sowieso gezèllig mit alle activiteite. Amuseier uch.
Pès de volgende van KUL pès KULTUUR . Mit de kómplimènte, John
===============================================================================
Van KUL pès KULTUUR, ein sjtökske Zittesj van mich veur uch.
Jaorgank 9 nr.7 4-4-2024
Vazele kal.
Ich sjtóng lèts in ei gesjef te wachte pès ich gehólpe zou waere. Achter mich woort de rie ummer langer en langer. Mer ’t waar waal ein gezèl-lige rie, teminste, dat dach ich. D’r woort väöl gelache en zo hel gekald dat ich bekans woord veur woord al koosj versjtaon.
Drie mansluuj hawwe ’t euver eine ‘kammeraod’ dae d’r neit bie sjtóng. “Höbs te gezeen wie dae gister sjpeelde?” vroug nómmer ein aan de anger twee. ’t Antjwoord heurde ich neit goud mer waal ’t enorme gelach. En doe begoosj ’t pas richtig. Nómmer twee deig d’r nog ein sjöp baovenop: “ Höbs te ouch gezeen waafer trainingspak hae droug?” Ein tweede lachsalvo volgde. “En dae sjlappe opsjlaag van häöm”. Zo góng ’t mer door. Volges mich góng ’t euver eine ‘tennis vrundj’. Doe zouws mer zo’n vrunj höbbe!
Eigelik hawwe ze niks zinnigs te zègke. Op ’t Holles nuime ze zo emes eine kletsmajoor. Majoor is ein rang in ’t leger en de naam van eine legerpraediger dae de rang van majoor haet is kletsmajoor. Dae kènt goud praeke, mer waat die drie deige waar ech gein praeke.
Me haet ’t dèkser euver wesjwiever, wawweltesje of braatsje, mer waat dees drie moelejanusse en kwatsjbaere veur eine vazele kal d’roet sjlouge waar ’t toppunt! Sjameswaerd. Óngertösje ware zie de ènnige die nog lachde. De rès van de klantje zjweeg en dach ‘tzelfde wie ich: besjtèlle, betale, nao boete en heivesj! Waat ein gekalfakter!(ge-roddel).
In ein volgende gesjef góng ’t gans angesj toe. De nómmerapparaat waar dao laeg, mer me lètde gedöldjig op wienee hae of zie aan de rie waore. Jederein haw tied zat, zo leek ‘t waal. Dao woort neme bemoeld, dao woort neme aaneingehange. Dao sjtónge waal ein aantal awbeppe, mer die vertèlde gans gezèllig mit hun naobere en d’n tied vloug óm. Dao dach neme besjtèlle, betale en nao boete. De meiste bleve veur de deur nog get nao klasjeneiere veurdat ze wiejer gónge. Waat ein ver-sjil!
Mit de kómplimènte, John Pès de volgende van KUL pès KULTUUR
==================================================================================
Van KUL pès KULTUUR, ein sjtökske Zittesj van mich veur uch.
Jaorgank 9 nr.6 24-3-2024
Taegesjtèllinge.
Eine ganse angere van KUL pès KULTUUR: Aeve d’r op oet in National Park Eifel
Op d’n daag dat de lente begoosj, leipe veer tösje Luftkurort Heimbach – de kleinste sjtad van Nordrijn-Westfalen - en häör wiek Hasenfeld in ein lekker veurjaorszunke. Veer beklómme de Meuchelberg en gónge raste op eine Eifel-lusbank, z’ón houte bank wo me mit z’n tweeje kènt zitte of ligke en mekaar toch in de ouge kènt kieke.
‘ne Sjlók water, ’n appelsien en eine krèntebol is de lunch van vandaag. Aafval zo wie ’t heurt in de bak dae naeve ’t infobord sjteit. Alles zuut ‘r wie gelek oet, sauber und gründlich. Geine graffiti, jao ein paar sjtikkers van wanjelclups en de verkennerie, mee neit. Dao lous ich ouch dat veer ein gemiddeld klöm-percentage van 8,2 % höbbe gehad en de sjteilste 100 maeter zelfs mit 14,2 %. Toch neit sjlech veur zevetig-plussers! In de wanjelgids woort dees wanjeling es ‘gemekkelik’ ómsjreve! Bietsjke euverdreve 😉
Óngerwaeg hawwe veer sjoon oetzich oppet ’t sjtedje mit de witte vakwerk-hoezer. De buim ware nog neit in blaad en veer keke neier op de kirke, oppet kesjteel Hengebach en op de in Jugendsjtiel geboewde waterkrachcentrale die dao aan ’t sjtuwmeer lik.
Wie veer lang genóg geras hawwe leipe veer dwaesj door de bósj euver sjmaal paedjes veurzichtig trök ómleeg en zouge al aaf en toe narcisse de köpkes opsjtaeke.
Bekans óngeraan woorte veer door eine kirkef geleid. De paorte van de kirkef sjtónge oetneudigend aope, ouch veur de wanjelaesj! De prechtige, goud verzörgde grave en blinkende urneveldjer sjtónge en louge sjtrak naevenein. Ouch hie gein sjpaor van kapotte sjtein of anger vandalisme. ’n Richtige lètste rösplaatsj.
Wie veer aeve op ein bank gónge zitte, mous ich dènke aan de protestantse begraafplaatsj van Zitterd, die taegeneuver ’t Toon Hermanstheater lik. Wie ich dao lèts langs leip sjrók ich van ’t breifke dat dao ophóng: Gesjlaote waeges vernielinge, deifsjtal en drugs-gebroek! Ich lous dao euveriges ouch dat ze in Zitterd al vruig ein protestantse gemeinte hawwe. Dat koum ómdat de hertog van Jülich (gein famieje) toendertied Jode en ouch Protestante in Zitterd toeleite (deige gedoge) en mit rös leite. Volges ein kroniek oet de tweede hèlf van de 14e eeuw woonde doe ouch al Joden in Zitterd. Róndj 1350 woorte zie sjlachoffer van vervolginge en daonao höbbe d’r 150 jaor gein mee gewoond. De awdste bekènde Joodse begraafplaatsj loug op Fort Sanderbout. Die woort eind 17de eeuw in gebroek genaome. Kort nao 1600 hawwe de Protestante ouch al ein eige begraafplaatsj hie. Ein biezunjere. D’r zeen zelfs graafmonumènte wo èngele op sjtaon en herden-kingsplaetjes aan Lourdes. Ich höb ’t jaomer genóg neit mit eige ouge kènne zeen, ómdat de begraafplaatsj – wie gezag – gesjlaote is.
Wie veer ein paar daag in de Eifel genaote hawwe van de ómgaeving en ’t sjoon waer, woorte veer oppe lètsten daag euvervalle door ein sjoel hagel! Waat ein taegesjtèllinge.
Mit de kómplimènte, John Pès de volgende van KUL pès KULTUUR.
==============================================================================
Van KUL pès KULTUUR, ein sjtökske Zittesj van mich veur uch.
Jaorgank 9 nr.5 26-3-2024
Bekans april !
Wie vèndj geer dat noe? Dat gedouns euver houte of plestik paerd, aolifante of leeuwe op de drejmeule oppe kirmes. Ein 1 aprilmop? Sjtraks maags te ouch nog geine opblaosbare krokodil in dien zjwömbad höbbe, of eine zjwömbandj van ein aenj zjwaan of flamingo! Mage de kènjer waal nog euver ’t paerd sjprènge in de gymzaal? En waat noe mit de yoga-oefeninge wie de hóndj, cobra, kat-kow, vlinder, doef en dolfijn? (die besjtaon ech) Ich vuil dat ich kaod waer es ich zo get laes. Sjus wie ’t plan óm ’t woord mo(o)der te sjrappe oet ’t bevolkingsregister! Gelökkig bèn ich neit de ènnigste dae dat flawwekul vèndj. Mer vilt dit noe ónger KUL of KULTUUR?? 😉
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Wat waal bij de KULTUUR van Zitterd heurt, is ’t krómbroodrape op 10 meert jl sjus wie de Sint Joepmert op 19 meert jl. Waat ein sjoon tradities höbbe veer toch. Mesjiens kènt de Superfanfare ouch ein waere?! Geine haet bie ’t krombroodrape get gezag euver ’t plattrappe van ’t graas van de kogelvanger, of ’t verjage van de veugel en kaorewouf door de meziek sss Ou En ’t Krom-broodrape-beeld kump op zien nuuj plaatsj baeter oet de verf, vènj ich.
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
De naam april kump van ‘t Latiense werkwoord aperire, dat “aopene” betekent. Waarsjienlik verwis dit naao de gruij van de plante en bloume in de lente. In ‘t Latien waar ‘t woord veur april aprilis en dit kènt muigelik trökgaon op ein Etruskisch woord dat oetèntjelik verbónje is mit de naam Aphrodite, de godin van de leifde. Die kènt zo wie bekènd in ’t vruigjaor (april) ouch flink gruije!
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Wie-t geer höb gemirk versjine mien sjriefsels nogal ónreigelmaotig. Dat kump ómdat ich mit anger zake bezig bèn gewaes die väöl tied in besjlaag genaome höbbe, zo wie ’t make van mien viefde buikske mit gedichter en verhaole in ’t Zittesj, dat pas is oetgekómme! Mer ouch ómdat veer in ’t vruigjaor zoväöl muigelik wille geneite van de natuur en d’r dus reigelmaotig ei paar daag tösjenoet gaon. Mer dat levert ouch weier nuuj verhaole op. Geer houf uch dus gein zörg te make. Ich blief sjrieve, blif geer laeze? 😉
~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~~
Pès de volgende van KUL pès KULTUUR. Blief gezóndj.
Reageiere: johnhertogh@gmail.com
Mien nuutste bouk “EINE POES BLOUME” is veur € 12,50 te koup bie Wim Krings.
Toch neit te duur veur ein sjtökske Zittesje kultuur!
=================================================================================
Van KUL pès KULTUUR, ein sjtökske Zittesj van mich veur uch.
Jaorgank 9 nr.4 28-2-2024
Bekans meert, feesmaondj!
’t Is bekans meert. Veur mich eine biezunjere maondj. Op de “Internationale Vrouwedaag”, 8 meert a.s., haop ich 75 jaor te waere. Danke, danke! En dat neit allein. Op daen daag lik ouch – es alles lök - mien viefde en nuutste bouk bie Wim Krings in de boukhanjel. (De oplaag is gelimiteierd, dus…)
D’n tittel is: EINE POES BLOUME in ’t Zittesj. Gevöld mit verhaole en gedichter en mit prechtige teikeninge van Jan Ruigt. ’t Zeen 165 pagina’s in A5 formaat. En…Alweier ein oetgaaf in de © Veldeke Krènk Zitterd reeks.
Mit St.Joep (19 meert) sjteit Veldeke Krènk Zitterd op ein biezunjer plaatsj: in ’t Mariapark op de Awwe Mert. Geer zeet dao de gansen daag wilkom. En es geer tösje 13:00 oer en 15:30 oer dao kómp, krig geer gans veur niks ein perseunlik weurdje van de dialeksjriever gesjreve in eur aangekoch buikske.
Veur de pries houf geer ’t neit te laote, want 12,50 is toch neit te duur veur ós Zittesje kultuur!
De Sint Joepmert is eine jaormert mit ein rieke gesjichte van mee es 200 jaor. Teendoezende bezuikesj oet de regio en wiejer weg kómme dan nao Zitterd.’t Is neit allein de eesjte van ‘t jaor mer ouch de grootste van ’t ganse landj! Mee es vief kilometer aan kräöm sjtrèkke zich oet door de historische bènnesjtad.
Sjpraekweurd over meert:
In meert zeen alle ketjes graw en löp zich mennige jóng de sjene blaw. Beteikenis: In meert kriege väöl verleifde de haos (kous)oppe kop (waere dan aafgeweze). En ouch: Meerts sjneewater - water van in meert gevalle sjnee - is ein goud millesien veur brennende (óntsjtaoke) ouge. En: Hómmel in meert is zaenge veur de aerd!
Meert kump van Mars, de god van de oorlog; zo genuimp omdat in ‘t vruigjaor de sjtried, dae in de wèntjer sjtil loug, weier wiejer koosj gaon.Oorsjpronkelik waar Mars ouch de god van ‘t gewas; in meert kump dit op. Ze nuime meert ouch waal dorremaondj. Deze naam sjleit op de kale, dorre tek van buim en sjtruuk die nog neit volop in blui sjtaon.
Blief gezóndj. Zeen veer ós op Sint Joep? Reageiere: johnhertogh@gmail.com
===============================================================================
Van KUL pès KULTUUR, ein sjtökske Zittesj van mich veur uch.
Jaorgank 9 nr.3 9-2-2024
Laesvouwer .
Veurdat geer uch in de Vastelaoves-viefdaagse sjtort, sjik ich uch mien nuutste sjtökske. Nog sjus veur de vastelaovend haet Koen Bothmer oet Houtem (Holtum) ein veurlaesbuikske oetgebrach mit d’n tittel: “Vastelaovendture”. Gesjik veur kènjer van 5 pès 8 jaor en hun awwesj of grootawwesj natuurlik. ’t Is ein sjpan-nend verhaol dat de houfpersoon, Resi oet Houtem, door de ganse provins leet zuike nao de verlaore scepter van de prins. Behawve ‘t Houtems dialek kómme ouch anger Limburgse dialekte veur in dit buikske. En es geer gein (klein-) kènjer höb óm veur te laeze: de 143e jaorgank van de officieel gezèt van de Marotte Zitterd: “De Pappegey”, is ouch de muite waerd! D’n tittel van mien sjtökske is neit veur niks van KUL pès KULTUUR, ein sjtökske Zittesj van mich veur uch.
Oetwejje.
Veer gaon nao de vastelaovesdaag, es ’t waer ’t toeleet, aeve oetwejje. Nao de Swif-tervallei. Mit de trein vare veer dan nao Den Helder, mit de boot nao ’t eilandj en dan nao ós besjtömming, wo ein aantal famiejeleje, die neit zo van de Vaste-laovend zeen, ós opwachte. Gezèllig. Aeve zuvere zawte zeelóch sjnoeve. En lekker wanjele op ’t sjtrandj. Ich höb mich get verdeip in ’t eilandj. Wós geer trouwes dat Texel (me zaet Tessel) neit ummer ein eiland is gewaes? In 1170 woort ’t ein eiland door de zgn. Allerheiligenvloed. Doe woort ’t losgesjlage van ’t vastelandj. En wós geer dat Ouwe Sunderklaas in Texel wurt/woort gehawte. Ein bekans oetgesjtórve gebroek, wo bie in alle dörper ‘gesjpeuld’ wurt. Speulen (nae gein Mestreichs) wilt zègke, dat ein bepaold plaatsjelik nuutsfeit van ‘t aafgeloupe jaor wurt naogesjpeeld. Dat speulen gebeurt mit maskes op, zodat de speulers neit te herkènne zeen. ’t Liek ’n bietsjke op ’t laammake van de Zittesje hoeraes…
Sjtechele.
Me haet zich waal goud gesjtecheld euver d’n oetsjlaag van ’t LVK. Da’s toch jeder jaor ‘tzelfde, vènj ich. Sjtechele of leiver gezag laammake heurt toch ouch eigelik bie de vastelaovend. ’t Is toch sjoon dat ‘r zoväöl leidjes in ós taal waere gebrach! ’t Is bekans Valentijnsdaag. Ich höb dao ooits ein verhäölke euver gesjreve, waat ouch in miene nuje verzamelbundel “EINE POES BLOUME in ‘t Zittesj” sjteit. Mer dao-euver mee in de volgende van KUL pès KULTUUR op 27 fibberwari aan-sjtaonde.
Ich wunsj uch allenej ‘ne zelige Vastelaovend!
=================================================================================
‘n Korte van KUL pès KULTUUR, ein sjtökske Zittesj van mich veur uch.
Jaorgank 9 nómmer 2 en einhawf 26-1-2024
Ein korte van KUL pès KULTUUR
Op dónderdig 25 jannewari woort bie poptempel VOLT bie Tekstverslaafd van Drik Heffels de nuje Zittesje sjtadsdichter benuimp/oetgeroupe. ’t Initiatief koum van de gemeinte Zitterd en is tiedes de Sjtadsgesjprekke in de Ligne aangezjwengeld bie de wethawwer. Tiedes die biejeinkoms woort Drik Heffels doe al abusievelik geïntroduceierd es de sjtadsdichter, mer dat haet ‘r dae aovend nog gekorrigeierd! Mer noe is ’t dan toch gebeurd:
Ouch van mich eine gemeinde perfisiat veur de driede sjtadsdichter van Zitterd, nao Rouke van der Hoek en Lilian Caessens. (in de gezèt haw me die ‘vergaete’ te nuime!)
Meistes geit ’t bie dit saort verkeizinge toch zo dat ‘r van te veure goud reklaam wurt gemaak, zodat eventuele kandidate zich bietieds kènne insjrieve en ouch de veurwaarde, de criteria veur de deilnummesj en de jurylede dan bekènd waere gemaak. Zo góng ’t ouch mit de verkeizinge van beveurbeeld de Zwentibolddichters. Mer dat góltj doe veur ein groter gebied dan de sjtad, namelik ’t ganse landj van Zwentibold. (sjrif eine greutsje awd-Zwentibolddichter!)
Wie ich de aankóndiging van de oetruiping op FB lous, kreeg ich metein van allerlei kènj de vraog of ich mee wós euver de sjtadsdichter. Ein groot deil van de mich bekènde dichtesj en dichteresse oet Zitterd haw niks geheurd en haw gein idee van wae, wie of waat. Woróm ze mich dat vrouge weit ich neit, mesjiens ómdat ich al op laeftied bèn?? Eigelik, zo lous ich in ein raodssjtök, zou in eine sjriefwedsjtried bepaald waere wae de nuje sjtadsdichter zouw waere. Dat klónk logies. Mer noe is direk gekaoze veur Drik! De gemeinte leet weite dat “eine sjriefwedsjtried oetsjrieve neit haolbaar waor bènne ’t tiedsbesjtek wo-in dat noe nog zou mótte gebeure”?! Ouch ’t feit dat Drik mit zien “Tekstverslaafd” mee kontakte mit de jóngere inwonesj van de gemeinte haet, haet natuurlik ein rol gesjpeeld. Mer ich dènk dat de generatie dichtesj die óngesubsideierd op hun kaemerkes mui-zelig hun gedichter sjrieve, haope dat ze neit vergaete waere in de planne van Drik! Tensjlotte: In de nuutsbreif van de gemeinte lous ich dat Drik de kómmende twee jaor inwonesj geit betrèkke bij de dichtkunst. Sjoon hè, mer dao-achter sjtóng ein zin-ke dat mich toch waal deig naodènke: “Dit is meer dan alleen versjes voorlezen!” Dat vónj ich neit sympatiek klinke.
Drik, nogmaals: van harte gefillisiteierd en väöl sukses!
John Hertogh. De volgende van KUL pès KULTUUR kump d’r aan
=================================================================================
Van KUL pès KULTUUR, ein sjtökske Zittesj van mich veur uch.
Jaorgank 9 nr.2 22-1-2024
Vrasje, oftewaal ‘t Nuujjaor aafgewènne.
2024 is in jeder geval knallend begoosj! Drie waeke geleje alweier. Waat ein lawaai, waat eine sjtank. Ich mót toegaeve d’r waar toch waal ouch sjoon seier-vuurwerk bie. Ouch ’t vrasje waar gans gezèllig. Vruiger, wie veer nog in ’t Lömmericherveldj woonde, waar ‘t eine richtige sjport óm es eesjte eemes te vrasje mit Nuujjaor. Veer kènjer versjtaoke ós goud en sjprónge ónverwachts op óm famieje, vrunj of kènnisse ’t eesj “ei Zelig Nuujjaor” te wunsje. Degein dae vrasj woort, mous ‘aafbetale’ mit sjlók, waffele of soms ouch mit ein knepke, dubbeltje of kwartje. (veur de jóngere laezesj: 5, 10 of 25 cent). Ich lous ouch urge ein versjke oet daen tied mit bèste wunsje: “Zelig nuujjaor, de kop vol haor, de kop vol nete, zeve maol in ’t bèd gesjete”. Mer dat höb ich al gans lang neit mee geheurd. En ouch neit deze witz: “Daags veur Nuujjaor sjteit eine man oppe Mert mit zoväöl naze es ’t jaor (nog) daag haet”. Degeine dae dit vertèlt mómpelt of ‘vergit’ ’t weurdje ‘nog‘.
Intösje is de krisvakans ouch aafgeloupe, de krisboum en ’t krubke zeen op-geruump en ’t volgende feeste zeen al gevierd: De geweldige Plök- en Vaerezitting van de Auwtprinse, wobie exprins Ruud Rousseau beheurlik flink woort aangepak en de gezèllige receptie van de nuje sjtadsprins Nick II mit twee nuuj Riddesj in de Orde van de Pappegey Jan Janssen (van de Sies) en Jan Schaekens (van o.a. ’t Kerkesprojek) plus de insjtallatie van grootvors Jan Janssen. ‘t Vastelaovessezoen is dit jaor erg kort, mer daodoor kènne veer waal achter-mekaar geneite van al waat op ós aafkump. Ich wunsj uch allenej väöl plezeier! Op L1 leite ze al ein sjoon sjtökske zeen van ’t Kerkesprojek in de Optochhal. Zelfs bie ’t Jeugjournaal hawwe ze ouch ein ‘item’ dao-euver. De meziek dae ze daobie dreejde waar eine richtige vastelaoveskraker: Er staat een paard op de gang! ’t Blieve Hollenjers 😉
Op Feesbouk laes ich aaf en toe ouch berichte euver ónkontente inwonesj van ós sjoon sjtedje. Euver ’t water in de grach beveurbeeld, of euver de perkeiertarieve. Ich höb dat ’s vergeleke mit de get grotere dörper en sjtae van Limburg en dan vilt dat toch waal mit. In ós Rosaparking kènt me de gansen daag veur vief euro dreug perkeiere!
Aafgeloupe zóndigmiddig zeen veer nao ’t Toon Hermans Theater (de Sjouwburg) gewaes óm te kieke en te loestere nao Rob Mennen en óze Cyrille Niël. (Veur eine euro koosjte veer dao perkeiere!) ’t Waor ein sjoon interview van 6x11 minute mit fejn leidjes door Cyrille en prechtig pianosjpel van Rob. En ein lekkere frikandel! De zaal haet weier ‘ns goud kènne lache en geneite van de vraoge èn antjwoorde van dit tweetal. Rob wit noe ouch dat in Zitterd Vastelaovend wurt gevierd en geine Carnaval.
Pès de volgende van KUL pès KULTUUR op 26-1-2024, of eerder of later! Blief gezóndj. Reageiere: johnhertogh@gmail.com
===================================================================================
Van KUL pès KULTUUR , ein sjtökske Zittesj van mich veur uch, door John Hertogh
Jaorgank 9 -1 2-1-2024
Oetgeroetsj?
Wie_t geer zuut is de kop van dit eesjte sjtökske van dit jaor get verangerd. Geer zuut noe mien femiejewaope, ’t waope van Zitterd, de logo’s van de Algemeine Sjrieverskrink, Veldgewas en Veldeke Zitterd d’r baove sjtaon. Die zeen mich al-lenej aeve leif, daoróm! En ’t is weier ’s get angesj.
‘t Logo van de Zwentibolddichter haet zien deins gedaon, alle ouge zeen waat dat betruf gerich op mien opvolgster Annemarie Gulikers. Sukses Annemarie… en sjrief ouch ’s get in ‘t Zittesj! 😊
Ein nuut jaor. Ich vuil aan mien water dat ’t óndanks alle elenj oppe welt toch ein fejn jaor wurt. Wae mich kènt wit dat ich noe einmaol positief bèn ingesjtèld. Laote veer aanvange mit de feeste die oppe rol sjtaon of sjus veurbie zeen. Allereesj: Zeet geer goud ’t Nuujjaor ingeroetsj? Awdjaorsaovend wurt wurt bie ós naobere Sylvester genuimp. Dat waar de sjterfdaag (in ’t jaor 335) van de Hèlge Sylvester, de 33e paus van de R.K. Kirk. Hae is de patroonheilige van de hoes-deiere, ‘ne gouwe ougs en ’t nuje jaor.
Euver ein paar daag, zaoterdig de zösde jannewarie is ’t neit allein DrieKeuninge mer dan is ouch de Plök en Vaere Zitting van de Marotte en einen daag later receptie van de Sjtadsprins, alletwee in ’t Forum. En neit te vergaete: op zaoterdig 13 jannewarie sjpeelt ós Fortuna taege Sparta! Óm hawf vief al. Taege daen tied zal ich ouch waal de krisboum en alle lempkes en verseieringe nao de zölder höbbe gebrach! En de vastelaovessjpulle nao ónger!
Aangezeen ich get mee tied wil besjtaeje aan mien gedichter en korte verhaole en ouch nog ummer ómgang bèn mit mien viefde buikske dat in meert wurt gepre-senteierd, kómme de sjtökskes van van KUL pès KULTUUR veurluipig óm de drie waeke op eure mail, op Feesbouk en op mien site www.zittesj.jouwweb.nl Euver de päöl nuime ze dat ouch waal “kürzer treten”! Mer geer houf uch gein zörg te make…ich blief sjrieve, ouch in 2024. Haopelik blif geer ouch alles laeze.
Pès de volgende van KUL pès KULTUUR op 22 jannewari 2024. Blief gezóndj. Reageiere: johnhertogh@gmail.com
=======================================================================================
Maak jouw eigen website met JouwWeb